Net- og símasamband lá niðri í langan tíma í gær á stofnunum Hafnarfjarðarbæjar og dæmi var um að fólk þurfti að fara heim til að geta unnið vinnuna sína.
Eðlilegu netsamband komst aftur á í gærkvöldi en starfsmenn bæjarins upplifðu truflanir á netsambandi og síma í morgunsárið. Nær það til allra starfsstöðva sveitarfélagsins.
Í tilkynningu á vefsíðu bæjarins, sem þó er virk, segir að áframhaldandi greiningarvinna sé í gangi og eins og staðan sé núna þá sé erfitt að segja til um hver framvindan verði.
Skv. heimildum Fjarðarfrétta er orsökin netárás og hefur það fengist staðfest hjá Hafnarfjarðarbæ:
„Miðað við fyrstu greiningargögn er að öllum líkindum um að ræða utanaðkomandi árás á netkerfi bæjarins sem veldur því að eðlileg netumferð, eins og tengingar við hýsingaraðila, símkerfi og raun öll netnotkun, verður undir í yfirflóði gagna. Slíkar árásir eru nokkuð algengar en hafa til þessa haft lítil sem engin áhrif á nettengingar sveitarfélagsins. Hér er um að ræða fyrstu vísbendingar um orsök truflana.
Greiningarvinna mun halda áfram og viðeigandi ráðstafanir vera gerðar til að draga úr líkum á því að slíkar truflanir gerist aftur þó aldrei sé hægt að koma alveg í veg fyrir svona árásir. Íbúum og öllum þeim sem reyna að hafa samband við sveitarfélagið er þakkaður sýndur skilningur.“
