Meðal þess sem kynnt var við framlagningu fjárhagsáætlunar fyrir Hafnarfjarðarkaupstað var að veita umtalsverðu fjármagni til leikskólanna með það að markmiði að skapa enn betri og meira aðlaðandi starfsumhverfi í leikskólum bæjarins.
Sagði bæjarstjóri í kynningu að erfitt sé að fá fólk og að halda fólki en auknar kröfur hafi kallað á fleira starfsfólk. Hafi stjórnendur Hafnarfjarðar velt fyrir sér hvernig hægt væri að efla leikskólastarfið en mikið álag sé inni á leikskólunum. Sé það vegna langra vinnudaga, styttingar vinnuvikunnar og að aukin þjónusta hafi leitt til þess að álag sé mikið.
„Við erum að horfast í augu við það og viðurkenna það og viljum gera allt hvað hægt er til að bæta aðstæður hjá fólki sem þar starfar,“ sagði bæjarstjóri m.a.
Á meðal þeirra aðgerða sem gripið verður til er:
- Stjórnunarhlutfall aðstoðarleikskólastjóra verður 20-35% til að auka faglegt starf.
- Hlunnindi og styrkir til leikskólastarfsfólks verða aukin, m.a. með hækkun á fastri yfirvinnu til allra og bíla- og símastyrk til stjórnenda.
- Starfsfólk leikskóla fái 75% afslátt af leikskólagjöldum.
- Handleiðsla og námskeið starfsfólks verði efld.
- Undirbúningur verður hafinn að stækkun Smáralundar um eina deild með það fyrir augum að lækka inntökualdur barna niður í 12 mánuði í skrefum næstu árin.
- Komið verði á sveigjanlegum dvalartíma sem skrefi til styttri dvalartíma barna.
Ummæli
