Óráðin vegferð minnihlutans

Ólafur Ingi Tómasson

662

Í síðasta blaði Fjarðarpóstsins skrifa bæjarfulltrúar Samfylkingar­innar og VG grein um fasteigna­skatt. Þar er fullyrt að álögur á íbúa bæjarins séu auknar um 21% og að skattahækkun meirihlutans í Hafn­ar­firði eigi sér enga hliðstæðu og sé fordæmalaus í 108 ára sögu sveitarfélagsins. Jafn­framt er fullyrt að leigj­endur íbúðarhúsnæðis hafa tekið við verulegri hækkun á leigu umfram það sem gerst hefur hjá öðrum sveitarfélögum á höfuðborgarsvæðinu vegna þessa. Það er rétt að álagningarprósenta hækkaði úr 0.28% í 0,34% en á móti lækkaði vatn- og frárennsligjald þannig að fasteignagjöld á íbúa í Hafnarfirði eru óbreytt milli ára. Innbyrðis tilfærsla frá vatns- og fráveitu­gjöldum yfir í fasteignaskatta hefur ekki áhrif á heildargjöld á íbúa, nema til lækkunar gagnvart elli- og örorkulífeyrisþegum.

Það sem rétt er

Hið rétta eins og áður er getið er að ekki var verið að hækka álögur á íbúa, og minnið virðist bregðast hjá þessum ágætu bæjarfulltrúum sem voru í meirihluta á árunum á árunum 2010-2012 þegar álagn­ingar­prósenta fasteignaskatts hækk­aði úr 0,24% í 0,32% án þess að nokkur lækkun á veitugjöldum kæmi á móti en það er hækkun um 33% sem svo sannarlega á sér ekki hliðstæðu í sögu sveitarfélagsins. Fulltrúar Samfylkingar og VG leggja jafnframt til að tekju­skerð­ingu bæjarsjóðs verði mætt með hagræðingu í yfirstjórn og stjórn­sýslu. Ekki fylgja neinar tillögur um hvar og hvernig á að hagræða, minna má á að á síðasta ári réðst núverandi meirihluti Sjálfstæðis­flokks og Bjartar Framtíðar í umfangsmiklar úttektir á rekstri sveitarfélagsins og í kjölfarið í ýmsar hagræðingar í rekstri sveit­ar­félagsins sem hafa skilað miklum ár­angri. Bæjarfulltrúum Samfylkingar og VG var boðið að taka þátt í þeirri vinnu en því boði var hafnað, þess i stað hafa þessir sömu bæjarfull­trúar í málefnaþurrð sinni staðið fyrir ómálefnalegri gagnrýni og rang­túlkunum á störfum meiri­hlutans.

Lægri álögur

Fasteignamat fyrir árið 2017 hækkaði umfram almennar verð­lagshækkanir og með aðgerðum meirihlutans í ýmsum hagræð­ingum er fjárhagur sveitarfélagsins á réttri leið og því er eðlilegt að lækka álagningarprósentu fast­eignaskatta á íbúðar- og atvinnu­húsnæði við gerð fjárhagsáætlunar fyrir næsta ár. Álögur á barna­fjölskyldur hafa lækkað verulega, má þar nefna að leikskólagjöld hafa verið óbreytt í þrjú ár, inn­ritunaraldur leikskólabarna lækk­aður úr 24 mánuðum í 18 mánuði, niðurgreiðslur til dagmæðra auknar verulega, frístundastyrkur til barna og unglinga aukinn og viðmiðunaraldur þeirra hækkaður í 18 ár. Aukin aðsókn ungs fólks í bæinn og hækkun á fasteignaverði ber þess glöggt vitni að við sem sveitarfélag erum svo sannarlega á réttri leið og Hafnarfjörður er spennandi valkostur til búsetu. Neikvæðni og rangfærslur fulltrúa Samfylkingarinnar og VG dæma sig sjálfar.

Höfundur er bæjarfulltrúi (D).

Ummæli

Ummæli

Skilja eftir athugarsemd

Please enter your comment!
Please enter your name here