Skipulagsslys á lóð St. Jósefsspítala

Steinunn Guðnadóttir skrifar

Steinunn Guðnadóttir - Ljósm.: Guðni Gíslason

Mikilvægt fyrir andlega og líkam­lega heilsu að geta notið útiveru í fallegum garði
Byggja á 6 íbúðir með 8 m hæð á baklóð St. Jósefsspítala, og þrengja þar með að starfsemi og ásýnd Lífsgæðaseturs St. Jó. Ekki nóg með það heldur liggur svo mikið á að selja þessar lóðir til einkaaðila undir heitinu þétting byggðar að Þóruklöpp náttúruvætti og forn­minjar sem hafa varð­veislugildi í sögu sjúkrahússins fá ekki einu sinni að vera sjúkrahús­smegin heldur seljast líka til einkaaðila. Auglýsing um um­sóknir lóð­anna er rétt rúmur hálfur mán­uður. Hvað með almannarétt og aðkomu nærsamfélagsins. Hafnfirð­ingar eiga þessa lóð.

Hafnarfjarðarbær hefur ekki sinnt því að svara þeim einstaklingum sem gert hafa athugasemdir og eru aðilar máls eins og nágrannar sjúkra­hússins. Ekki var rætt í upphafi breytinga við þá sem reka starfsemi í húsinu, hvernig þeir aðilar komi til með að sjá fyrir sér að starfsemi og umhverfi lífsgæðasetursins þróist í framtíðinni, eins og það skipti ekki máli hvernig umhverfi Lífs­gæðasetursins er!

Hollvinasamtök St. Jósefsspítala eru stofnuð árið 2014. Sjúkrahús St. Jó. var lagt niður 2011 og hafa hollvinasamtökin gert athugasemdir, alveg frá því að ríkisvaldið ætlaði að selja sjúkrahúsið hæstbjóðanda. Holl­­vinasamtökin óskuðu eftir aðkomu Minjastofnunar Ís­lands sem telur allar bygg­ing­ar sjúkrahússins þar með talið Kató hafa verndargildi út frá byggingarsögulegu sjónarmiði. Hollvinasamtökin hafa ítrekað gert athugasemdir við breytingu á stofnanalóð St. Jósefsspítala og fækkun bílastæða fyrir stofnunina, en að framan­verðu við aðalinngang stofnun­arinnar eru einungis 6 bílastæði. Nú verður baklóð St. Jósefsspítala verulega þrengd og skap­að skuggavarp heim að byggingu sjúkrahússins. Hollvinasamtökin kærðu til úrskurðarnefndar Umhverfis og auð­lindamála, eftir að Hafnarfjarðarbær svaraði ekki athugasemdum þeirra við breytingu á skipulagi.

Hollvinasamtökin hafa talað fyrir því að lóð St. Jósefspítala verði nýtt fyrir Lífsgæðasetrið og byggð upp sem slík. Margar rannsóknir liggja fyrir hversu mikilvægt það er fyrir andlega og líkam­lega heilsu að geta notið útiveru, farið í göngu í nærumhverfi sínu og sest niður í fallegum garði við góðan aðbúnað, þá getur meðferðaraðili að sjálfsögðu nýtt slíka aðstöðu með skjólstæðingi sínum. Það sjá allir sem eitthvað hafa með endurhæfingu að gera andlega og líkamlega eins og t.d. þau fyrirtæki og félagasamtök sem starfa í Lífsgæðasetri St.Jó. Sorgarsamtökin, Parkinson­sam­tökin, Alzheimersamtökin, Janus heilsu­efling og fleiri góð fyrirtæki, hversu mikilvægt það er að umhverfi Lífs­gæðaseturs St.Jó. sé heilsueflandi og uppbyggjandi.

Alls ekki eins og stefnt er að í dag þar sem ákvörðun bæjaryfirvalda er að troða 6 einkalóðum í bakgarð St.Jó.

Heilsuefling miðar að því að hafa áhrif á lífsstíl fólks og gera því kleift að lifa heilsusamlegu lífi við heilnæmar aðstæður og að umhverfi hafi áhrif á heilsu fólks samkv. skilgreiningu Land­læknisembættisins. Hafnarfjarðarbær er sam­kvæmt samningi frá 2015 heilsu­eflandi samfélag.

Hollvinasamtökin skora á bæjaryfirvöld að sýna framsýni og byggi upp heilsu­eflandi garð fyrir starfsemi Lífs­gæða­setursins og falla frá úthlutun baklóða sjúkra­hússins til einkaaðila. Bæjaryfirvöld geta tekið slíka ákvörðun, enda nægt lóðaframboð í Hafnarfirði.

Steinunn Guðnadóttir,
formaður Hollvinasamtaka St. Jósefsspítala

Ummæli

Ummæli