Sambo 80 er nýtt íþróttafélag í Hafnarfirði sem hefur gert samning við Hafnarfjarðarbæ
Með stuðningi Hafnarfjarðarbæjar getur Sambo 80 nú boðið uppá æfingar fyrir börn og ungmenni í sambo sem er sjálfsvarnar og glímuíþrótt.
Hafnfirðingurinn Alex Stoljarov, sem er stofnandi og formaður Sambo á Íslandi Sambo, segir sambo vera íþróttagrein sem hafi góða möguleika á að verða mjög vinsæl á Íslandi.
„Bæði strákar og stelpur geta stundað þessa íþrótt og einnig fatlaðir og fólk á öllum aldri. Keppt er í greininni í mörgum flokkum á alþjóðlegum mótum en þessi íþrótt er mikið stunduð víða um heim,“ segir Alex.
Sambo 80 er deild í Sambo Ísland sem er aðili að Evrópudeild FIAS sem er eina viðurkennda alþjóðlega stofnunin sem ber ábyrgð á þróun sambo íþróttarinnar í heiminum.
„Íþróttin er í dag stunduð í öllum heimsálfum og stefnt er að því að sambo verði olympíugrein á næstu Olympíuleikum,“ segir Alex.
Æfingar að Flatahrauni 14
Æfingar hófust í byrjun nóvember í aðstöðu félagsins að Flatahrauni 14 og iðkendur geta notað frístundastyrk frá Hafnarfjarðarbæ til niðurgreiðslu æfingagjalda.
Fyrirhugað er að halda þjálfaranámskeið í nóvember og skilyrði fyrir þátttöku er reynsla í sambærilegum íþróttagreinum og áhugi á að byggja upp Sambo á Íslandi. Þetta námskeið er fyrir þá sem hafa áhuga á að verða samboþjálfarar fyrir skóla og klúbba.
Alex er þjálfari Sambo 80 en hann er með alþjóðleg þjálfararéttindi og mikla reynslu sem iðkandi, keppandi og þjálfari í Sambo.
Skráning er hafin á facebook síðu Sambo 80 og þar eru frekari upplýsingar.
