Í skýrslu um búsetu í atvinnuhúsnæði á höfuðborgarsvæðinu sem unnin var af Húsnæðis- og mannvirkjastofnun (HMS), Slökkviliði höfuðborgarsvæðisins (SHS) og Alþýðusambandi Íslands (ASÍ) og birt á síðasta ári kemur m.a. fram að 1,6% íbúa Hafnarfjarðar býr í atvinnuhúsnæði.
Er þetta hæsta hlutfallið á höfuðborgarsvæðinu.
Í könnun Slökkviliðsins á höfuðborgarsvæðinu sem framkvæmd var árið 2017 komu sterkar
vísbendingar fram um aukningu á búsetu í atvinnuhúsnæði á höfuðborgarsvæðinu. Þá var
fjöldi staðfestra óleyfisíbúða í atvinnuhúsnæði alls 309 íbúðir og var áætlað að í kringum
3.500 – 4.000 einstaklingar væru búsettir í slíku húsnæði á höfuðborgarsvæðinu.
Í könnun sem gerð var 2021-2022 kemur fram að nú séu 1.868 íbúar á 204 heimilisföngum og þarf af 19 börn og skv. því hefur íbúum í atvinnuhúsnæði fækkað verulega eða að fyrri tölur hafi verið ofmetnar.
472 búa í atvinnuhúsnæði í Hafnarfirði
46% þessara 1.868 sem búa í atvinnuhúsnæði búa í Reykjavík en 472 í Hafnarfirði eða 25,3%. Kópavogur kemur þar á eftir með 353 eða 18,9% og hin sveitarfélögin koma þar langt á eftir.
Það vekur að hæst hlutfall íbúa í sveitarfélagi sem búa í atvinnuhúsnæði er í Hafnafirði þar sem 1,6% búa í atvinnuhúsnæði, hlutfallið er næst hæst í Kópavogi þar sem 1,2% búa í atvinnuhúsnæði og 0,7% íbúa Reykjavíkur býr í atvinnuhúsnæði og 0,6% Garðbæinga.
Brunavörnum víða áfátt
Við mat á brunavörnum í því atvinnuhúsnæði sem var skoðað var upplýsingum safnað um ákveðnar lágmarks brunavarnir. Þau skoðunaratriði sem lagt var mat á var hvort brunaviðvörunarkerfi eða reykskynjarar væru í húsnæðinu, hvort slökkvitæki væri til staðar og eldvarnarteppi sýnilegt, hvort tvær flóttaleiðir væru úr húsnæðinu og hvort því væri skipt í brunahólf, sem og stöðu eldvarnarhurða.
Á ofangreindri mynd má sjá hvernig skoðun á brunavörnum kom út miðað við hlutfall íbúða. Við skoðanir voru brunaviðvörunarkerfi og reykskynjarar mest sýnileg og voru til staðar í um 59,3% tilfella. Í 55,4% tilfella voru slökkvitæki til staðar, hvort sem er í íbúðinni eða við flóttaleið/ ir. Þá voru tvær flóttaleiðir fyrir hendi í einungis um 37,7% tilfella, sem segir líka til um hvenær viðkomandi húsnæði var byggt en í núgildandi byggingarreglugerð er almennt gerð krafa um tvær flóttaleiðir. Eldvarnarteppi var sýnilegt í 19,6% tilvika. Þá var brunahólfun og eldvarnarhurðir til staðar í 17,2% tilvika.
Mat eftirlitsfulltrúa var að ástand brunavarna þar sem fólk bjó var ásættanlegt í 55,1% tilfella, ekki í lagi í 23,7% tilfella og í 21,3% tilfella var ástand ekki skráð þar sem ekki tókst að skoða húsnæðið með viðunandi hætti.
Lesa má skýrsluna í heild hér.
