Orkuveita Reykjavíkur hefur sótt um rannsóknarleyfi til rannsókna á jarðhita í Krýsuvíkursveimum til fimm
ára.
Var beiðni Umhverfis- og orkustofnunar um umsögn vegna umsóknar Orkuveitunnar um leyfi til rannsóknar og leitar að jarðhita á Krýsuvíkursveimum lagt fram á fundi umhverfis- og framkvæmdaráðs í gær 15. apríl.
Orkuveitan óskar jafnframt eftir því að Umhverfis- og orkustofnun veiti í rannsóknarleyfi fyrirheit um forgang að nýtingarleyfi fyrir hitaveitu í allt að tvö ár eftir að gildistíma rannsóknarleyfis lýkur og að öðrum aðila verði ekki veitt rannsóknarleyfi á þeim tíma.
Afmörkun svæðisins sem hér er sótt um rannsóknarleyfi fyrir miðast við það svæði sem Veitur sóttu um rannsóknarleyfi fyrir árið 2021 en fellur utan afmörkunar rannsóknarleyfis sem veitt var til HS Orku árið 2022.
Enginn yfirborðsjarðhiti er á athugunarsvæðinu en lítils háttar merki um kulnaðan jarðhita er að finna suðvestan þess, s.s. við Trölladyngju (s.s. í Sogum og Lambafelli) og Köldunámur vestan undir Sveifluhálsi. Útbreiðsla háhita á Krýsuvíkursvæðinu hefur komið vel fram í viðnámsmælingum frá síðustu áratugum.
Rannsóknaráætluninni er skipt upp í tvo áfanga:
- Áfangi 1. Yfirborðsrannsóknir. Í þessum áfanga verða gerðar viðnámsmælingar, rýni á sprungukort, skjálftagögnum, og mögulega þyngdarafl og segulmælingar með drónum.
- Áfangi 2. Í þessum áfanga er gert ráð fyrir að boraðar tvær til fjórar grannar rannsóknarholur niður á 1500 til 2500 m.
Þegar auðlindir hafa verið staðfestar verður hægt að leggja mat á hvernig þær verði best nýttar. Ef niðurstaðan verður sú að jarðhitaauðlind sé til staðar í Krýsuvíkursveimum og hún til henti til heitavatnsframleiðslu með sama hætti og nú er gert á Nesjavöllum og Hellisheiði gæti þurft að bæta við þriðja fasa rannsóknanna, þ.e. til að leita að heppilegu svæði til grunnvatnstöku til upphitunar.
Gert er ráð fyrir tveimur til fjórum grönnum rannsóknarholum á rannsóknarsvæðinu til að afla fyllri upplýsinga um jarðhitakerfið. Staðsetning borteiga og lega aðkomuvega er ekki endanlega ákveðin. Staðsetning mögulegra borteiga og lega aðkomuvega verður ákveðin endanlega samhliða leyfisveitingarferli og leitað verður jafnvægis á milli upplýsinga um jarðhitakerfið sem fæst með rannsóknarborunum og rasks sem hlýst af vegagerð og borteigum. Gert er ráð fyrir að aðkomuvegir verði einbreiðir, með útskotum, og að borteigar fyrir grannholur verði um 2500 m².
