Verkefnin framundan fyrir íslenskt samfélag eru mörg. Þau krefjast stöðugleika í atvinnulífi, langtímahugsunar og fjárfestinga, en fyrst og síðast þor til breytinga sem stuðla að umbótum fyrir samfélagið allt.
Heilbrigðismálin hafa loksins fengið verðugan sess í aðdraganda kosninga og er fagnaðarefni að allir flokkar hafa talað fyrir því að setja þau í forgang. Þá er bara að tryggja að svo verði.
Viðreisn hefur sett fram skýra stefnu um aðgerðir í heilbrigðismálum sem byggir á því að efla heilsugæsluna, styrkja sjúkrahúsin og hraða uppbyggingu í öldrunarmálum. Jafnhliða því skal dregið úr greiðsluþátttöku almennings.
Greiðsluskerðingar og tekjutengingar til aldraðra og öryrkja verða endurskoðaðar og lágmarkslífeyrir þessa hópa verði 300 þúsund krónur.
Menntakerfið er grunnur að frekari nýsköpun og fjölgun sprotafyrirtækja í landinu. Markmið Viðreisnar er að háskólar nái meðaltali framlaga OECD ríkjanna árið 2020. Með háskólum og samkeppnissjóðum á sviði rannsókna næst fram eftirsótt verðmætasköpun í stað þess að einblínt verði á virkjun náttúruauðlinda sem eina úrræði þjóðarinnar til aukins hagvaxtar.
Mörg önnur mikilvæg verkefni bíða. Eitt er lækkun tryggingargjalds sem vanrækt hefur verið að lækka en gjaldið kemur lang verst niður á litlum og meðalstórum fyrirtækjum. Langtímalausn í peningamálum er líklega sú mikilvægasta fyrir íslensk heimili og fyrirtæki en lækkun vaxta er mesta kjarabót íslenskra heimila til skemmri og lengri tíma. Þar liggja fyrir tillögur Viðreisnar um fastgengisstefnu og myntráð. Er fagnaðarefni að aðrir flokkar eru byrjaðir að tala fyrir því að peningamálastefna okkar verði endurskoðuð. Þetta er brýnt samstarfsverkefni opinberra aðila og aðila vinnumarkaðarins.
Löggæslumál hafa ekki verið sérstaklega í brennidepli fyrir þessar kosningar þótt vonandi viðurkenni flestir mikilvægi þess að hafa lögreglu vel mannaða og útbúna. Og líka glaða. Snúa verður niðurskurði síðustu ára við og taka málefni lögreglunnar til gagngerrar endurskoðunar en skýrslur liggja fyrir um forgangsröðun svo hægt er að ganga í verkið. Fyrr en síðar.
Viðreisn vill að kjósendur eigi kost á frjálslyndri stjórn sem getur dregið fram það besta á andstæðum vængjum stjórnmálanna.
Við teljum að íslenskt samfélag þarfnist stöðugleika á sviði stjórnmálanna, á vinnumarkaði og í efnahagsmálum. Það tryggir þjóðin best með því að skipta ekki um póla á fjögra ára fresti og kjósa öfganna á milli heldur að kjósa það afl sem stendur fyrir raunhæfar langtímalausnir en ekki kollsteypustjórnmál. Við viljum byggja á því sem vel hefur verið gert en þorum að horfast í augu við áskoranir nýrra tíma og viljum leiða mikilvægar breytingar á íslensku samfélagi.
Þorgerður Katrín Gunnarsdóttir
oddviti Viðreisnar í SV-kjördæmi
