Hafnfirðingar – veljum öfluga forystu!

Helga Ingólfsdóttir

Prófkjör Sjálfstæðisflokksins í Hafnarfirði verður haldið dagana 3. – 5. mars þar sem kosið verður á milli 14 einstaklinga á lista fyrir komandi bæjarstjórnarkosningar í vor.  Ég óska eftir stuðningi í 2.-3. sæti.

Ég legg með mér reynslu mína sem bæjarfulltrúi þar sem ég hef frá árinu 2014 verið formaður Umhverfis- og framkvæmdaráðs, varaformaður Fjölskylduráðs og frá árinu 2018 fulltrúi í stjórn Strætó bs. fyrir Hafnarfjörð. Þekking mín úr atvinnulífinu og breiður bakgrunnur hefur komið að góðum notum í störfum mínum sem bæjarfulltrúi og ég hef áhuga á að nýta áfram mína krafta og reynslu  fyrir sveitarfélagið okkar. Frá árinu 2013 hef ég sinnt trúnaðarstörfum sem stjórnarmaður í stjórn VR og ég er fulltrúi VR í stjórn Lífeyrisjóðs verslunarmanna (LIVE) auk þess sem ég starfa sem bókari í hlutastarfi.

Ég hef beitt mér af krafti fyrir ýmsum framfaramál á liðnum árum  og má þar nefna umhverfismál, samgöngumál, betri almenningssamgöngur, uppbygging íþróttamannvirkja, nýtt hjúkrunarheimili og endurbætur á Sólvangi, heilsuefling og frístundastyrkur fyrir eldri borgara, nýr vinnustaður fyrir fólk með fötlun og fjölgun búsetukjarna.

Á næstu 4 árum vil ég sjá bæinn okkar vaxa og dafna með auknu lóðaframboði og ég vil efla vistvænar samgöngur með átaki í hjóla- og göngustígum. Ég vil tryggja lóðaframboð og að byggðar verði hagkvæmar íbúðir fyrir lág og millitekjuhópa og eldri borgara. Ég vil samþætta þjónustu ríkis og sveitarfélaga fyrir eldri borgara og mæta ólíkum þörfum þessa hóps. Ég vil styðja við barnafjölskyldur með meiri samþættingu grunn og leikskóla og lækka innritunaraldur á leikskólum og auka sveigjanleika í vistunartíma.  Ég vil styðja áfram við öflugt menningarlíf og uppbyggingu íþróttamannvirkja.

Ég hvet Hafnfirðinga til þess að taka þátt í prófkjörinu og ég óska eftir stuðningi ykkar til þess að vera í forystusveit Sjálfstæðisflokksins í Hafnarfirði.

Helga Ingólfsdóttir,
bókari og bæjarfulltrúi

 

Ummæli

Ummæli