Nýja bæjarstjórnin náði einum fundi eftir kosningar og síðasta verk á þeim fundi var að samþykkja sumarfrí bæjarstjórnar. Fyrsti fundur verður svo 12. ágúst og þá eru eftir 4,5 mánuðir af árinu.
Spyrja má hvort við séum að kjósa á heppilegum tíma. Danir kjósa alltaf í nóvember og þá er búið að samþykkja fjárhagsáætlanir sveitarfélaga. Norðmenn kjósa snemma í september og sama gera Svíar. Finnar kjósa í apríl en við í maí. Það hlýtur að vera svolítið sérstakt fyrir nýja áhugasama sveitarstjórnarfulltrúa að fara næstum því beint í frí. Þetta á þó ekki við alla því bæjarráð sinnir skyldum bæjarstjórnar á meðan og sum ráðin þurfa að funda.
Eitt fyrsta verk nýrrar bæjarstjórnar var að ákveða að láta gera stjórnsýsluúttekt á rekstri sveitarfélagsins. Til verksins var valið fyrirtæki Haraldar L. Haraldssonar, sem hefur gríðarlega reynslu í slíkum verkum, auk þess sem hann gegndi stöðu bæjarstjóra í Hafnarfirði í 4 ár. Öll stjórnkerfi hafa tilhneigingu til að fara á sjálfsstjórn og þeir sem þar starfa fá ekki mikinn tíma til þess að horfa yfir sviðið og spyrja sig hvort verið sé að vinna á hagkvæman hátt. Þegar verst lætur snúast kerfin um sjálfan sig hætta að þróast. Þó liggur starfsfólk á mikill þekkingu og reynslu og þeirra sjónarmið eru gulls ígildi, ekki síst fyrir þann sem vinnur slíka úttekt.
Fjárhagsstaða Hafnarfjarðarkaupstaðar er ekki til að hreykja sér af þó finna megi verri stöðu hjá sveitarfélögum í nágrenninu. En skuldir hafa hækkað sem segir að við erum að eyða meiru en við öflum og það telst sjaldan gott. Því er mikilvægt að gera slíka stjórnsýsluúttekt og gjarnan mætti hún innihalda skoðun á pólitískum ákvörðunum um fjárútlát til ýmissa verkefna. Eru slík fjárútlát í samræmi við stefnu? Er jafnræðis gætt? o.s.frv. Hversu mikil áhrif hafa þrýstihópar, eru verkefnin til almannaheilla eða er verið að sinna sérhagsmunum?
Spennandi verður að sjá hvað kemur út úr stjórnsýsluúttektinni og ekki síður verður áhugavert að sjá hvað gert verður í kjölfar hennar.
Í málefnasamningi meirihluta í bæjarstjórn segir að aukið samtal og samráð verði haft við íbúa og hagsmunaaðila og notenda. Ekkert segir um gagnsæi í stjórnsýslunni og bætta upplýsingagjöf. Staðreyndin í dag að fundargerðir eru illa skrifaðar og ekki til þess fallnar að upplýsa bæjarbúa um hvað mál snúast. Á þetta hefur verið bent í aldarfjórðung og lítið hefur miðað í rétta átt. Mætti bæjarfélagið taka mörg bæjarfélög t.d. í Danmörku sér til fyrirmyndar. Kynning á breytingum á deiliskipulagi og gerð nýs deiliskipulags er sjaldan þannig að almenningur átti sig í raun hvað verið sé að gera. Reynt er að fela sig á bak við reglur um gerð skipulags sem bannar þó ekki að mál séu skýrð út þannig að sem flestir skilji. Fróðlegt væri að gerð yrði úttekt á því hversu mikið mark er tekið á athugasemdum íbúa við ýmsa þætti í skipulagsgerð. Einnig að aðgengilegar væru góðar leiðbeiningar til bæjarbúa um það hvernig skila eigi inn athugasemdum og hvaða athugasemdir eigi rétt á sér.
Í Hafnarfirði búa rúmlega 30 þúsund manns og á síðustu kynningu á tillögu að nýju aðalskipulagi mættu um 200 manns. Telst það að náð sé til bæjarbúa?
Njóttu sumarsins og í upplandi bæjarins má finna margar perlur og upplifa sögu þeirra sem hér bjuggu á undan okkur.
Guðni Gíslason ritstjóri.
