Á fundi bæjarstjórnar Hafnarfjarðar 26. ágúst var lagt fram nýtt erindisbréf fyrir fjölmenningarráð. Færa átti ráðið undir bæjarráð og uppfæra starfsreglur þess. Ég taldi rétt að skoða hvort bærinn þyrfti áfram að halda ráðinu úti.
Fjölmenningarráð er ólögbundið. Hafnarfjarðarbæ ber engin lagaleg skylda til að starfrækja það. Ráðið er skipað fimm aðalmönnum auk varamanna, fundar að jafnaði mánaðarlega og greitt er fyrir setu. Það veitir ráðgjöf og gerir tillögur en tekur engar bindandi ákvarðanir.
Ef formaður og fjórir aðrir aðalmenn fá greitt samkvæmt almennum mánaðarþóknunum fyrir formann ráðs og ráðsmenn allt árið nema greiðslurnar um 13,2 milljónum króna. Þá eru launatengd gjöld, greiðslur til varamanna og vinna starfsmanna Hafnarfjarðarbæjar ótalin. Ekkert heildarkostnaðarmat fylgdi málinu.
Bærinn hefur þegar verkefnastjóra fjölmenningarmála í fullu starfi. Hann á meðal annars að sinna samhæfingu, ráðgjöf, upplýsingamiðlun og samskiptum við stofnanir og félagasamtök. Minnisblað sem fylgdi málinu rökstuddi þörfina fyrir verkefnastjórann. Það skýrði ekki hvaða viðbótarhlutverki ráðið gegndi sem réttlætti sérstakan kostnað við það.
Í umræðunni um afrakstur ráðsins, sem var stofnað árið 2016, voru kaffihúsahittingar, samstarf við bókasafnið og kvennasund nefnd sem dæmi um verkefni sem hefðu sprottið af starfi þess.
Ef til vill eru þetta góð og gild verkefni, en þarf sérstakt launað ráð til að sinna þeim? Getur verkefnastjórinn ekki unnið með bókasafninu og félagasamtökum að slíku starfi? Hafnarfjarðarbær á fyrst og fremst að tryggja lögbundna opinbera þjónustu. Það er því eðlilegt að spyrja hvers vegna skipulagning kaffihúsahittinga og sambærilegra viðburða eigi að vera verkefni bæjarins og hvaða kostnað sé rétt að leggja á íbúa vegna þess.
Við yfirferð á sögu ráðsins, fundargerðum og fylgigögnum fann ég ekki fullnægjandi rök fyrir áframhaldandi starfsemi þess. Ég lagði því til að erindisbréfið yrði ekki staðfest og formleg vinna hæfist við að leggja ráðið niður. Nauðsynleg verkefni yrðu færð til viðkomandi fagráða, fagsviða og verkefnastjóra. Lögbundin þjónusta og nauðsynlegur stuðningur við íbúa skyldu ekki skerðast.
Fulltrúi Samfylkingarinnar lagði til að tillögunni yrði vísað frá. Fulltrúar Sjálfstæðisflokks, Samfylkingar, Viðreisnar og Framsóknar samþykktu frávísunina með tíu atkvæðum gegn mínu eina. Erindisbréfið var síðan samþykkt.
Tillagan náði ekki fram að ganga en kallaði fram umræðu um þörfina fyrir ráðið og kostnaðinn við það. Íbúar geta hlustað á upptöku fundarins á vef bæjarins og metið röksemdirnar sjálfir. Bæjarfulltrúar eiga að geta útskýrt hvers vegna þeir telja rétt að verja fé í áframhaldandi starfsemi ráðsins.
itt ráð ræður ekki úrslitum um fjárhag Hafnarfjarðar. Útgjaldaliðirnir safnast þó upp og aðhald krefst þess að þeir séu skoðaðir hver fyrir sig. Miðflokkurinn mun áfram leggja fram tillögur um að draga úr óþarfa kostnaði og krefjast þess að útgjöldin séu rökstudd. Við lofuðum því fyrir kosningar og munum fylgja því eftir.
Einar Geir Þorsteinsson
bæjarfulltrúi Miðflokksins í Hafnarfirði
