Stefanía Rós Th. Karlsdóttir og Stefán Óli Þorleifsson taka höndum saman á ný og taka við rekstri Leikfangalands. Það má segja að nýjasta verkefni Stefaníu Rós og Stefáns Óla eigi sér langa forsögu. Þau kynntust fyrst í Lágafellsskóla, urðu góðir vinir og áttu síðar eftir að starfa saman í leikfangabransanum í sjö ár. Nú hafa þau sameinað krafta sína á ný og tekið við rekstri Leikfangalands í Firðinum, Hafnarfirði.
Taka þau við góðu búi af þeim Ólafi Magnússyni og Lilju Sigmundsdóttur.
Leiðir þeirra lágu fyrst saman í grunnskóla og vináttan hefur haldist allar götur síðan. Árið 2011 hófu þau bæði störf hjá leikfangaheildsölu fjölskyldu Stefáns, sem var meðal annars með LEGO vörumerkið.
Þar störfuðu þau saman næstu árin og byggðu upp mikla reynslu af leikfangamarkaðnum, heildsölu og samskiptum við verslanir og birgja. Árið 2018 var heildsalan seld inn í A4 og þá tóku leiðir þeirra ólíkar stefnur.
Stefanía hélt áfram að starfa innan LEGO og hefur samtals starfað fyrir LEGO á Íslandi í 15 ár. Stefán fór í annan hluta heildsölubransans en hann starfaði hjá Mekka Wines and Spirits.
Nú, átta árum eftir að fyrirtæki fjölskyldu Stefáns var selt, eru þau komin saman á ný – að þessu sinni sem viðskiptafélagar.
„Það er eiginlega svolítið skemmtilegt hvernig þetta hefur þróast. Við kynntumst sem krakkar í grunnskóla, urðum vinir, fórum síðan að vinna saman og höfum nú tekið höndum saman á ný. Við erum eiginlega komin hringinn” segir Stefanía.
Nýr kafli hjá Leikfangalandi
Stefanía og Stefán hafa nú tekið við rekstri Leikfangalands í Firði. Þau hyggjast byggja áfram á þeim góða grunni sem fyrir er, en hafa jafnframt metnaðarfullar hugmyndir um frekari uppbyggingu.
Áhersla verður meðal annars lögð á að fríska upp á verslunina, þróa vöruúrvalið og skapa enn skemmtilegri verslunarupplifun fyrir börn og fjölskyldur.
„Við sjáum mikil tækifæri í þessum rekstri. Við viljum byggja áfram á því góða sem hefur verið gert en um leið koma með nýjar hugmyndir, spennandi vörur og ferska sýn. Við viljum að Leikfangaland verði staður sem börn hlakka til að koma á og sem foreldrum finnst notalegt að versla” segir Stefán.
Sterk reynsla beggja fjölskyldna
Þau Stefanía og Stefán koma bæði með mikla reynslu inn í reksturinn. Ásamt starfsreynslu sinni úr leikfangageiranum hafa þau alist upp í kringum fyrirtækjarekstur og hafa sterkt bakland fjölskyldna sinna.
Fjölskylda Stefáns á sér langa sögu í leikfangageiranum, en foreldrar hans ráku áður leikfangaheildsölu þar sem þau Stefanía og Stefán störfuðu saman. Sú reynsla og þekking á leikfangamarkaðnum hefur því fylgt Stefáni frá unga aldri.
Foreldrar Stefáns ráku áður leikfangheildsölu og þekkja því vel til bæði leikfangageirans og fyrirtækjareksturs. Foreldrar Stefaníu hafa um árabil rekið skiltagerð og mótorhjólaverslun og búa yfir mikilli reynslu af rekstri, stjórnun og bókhaldi.
Fjölskylda Stefaníu hefur einnig mikla reynslu af rekstri og innflutningi. Foreldrar hennar hafa um árabil rekið mótorhjólaverslunina KTM Ísland, sem fagnaði í ár 32 ára afmæli. Þar hefur Stefanía fengið góða innsýn í daglegan rekstur fyrirtækis, innflutning, samskipti við birgja og það sem felst í því að byggja upp og reka fyrirtæki til lengri tíma.
Þótt feður þeirra séu báðir látnir er fjölskyldubaklandið áfram stór hluti af verkefninu og bæði hafa þau fólk í kringum sig með mikla reynslu sem þau geta leitað til.
„Við erum mjög þakklát fyrir fólkið í kringum okkur. Við höfum bæði alist upp í kringum fyrirtækjarekstur og fengið að sjá hvað þarf til að byggja upp og reka fyrirtæki. Það er mikil þekking og reynsla sem við getum leitað í,“ segir Stefanía.
Frá vinskap í grunnskóla til viðskiptasamstarfs
Það er því ekki tilviljun að leiðir þeirra hafi legið saman á ný. Þau þekkjast vel, hafa unnið saman áður og deila áhuga á leikfangageiranum.
Árið 2011 hófu þau störf saman. Árið 2018 skildi fyrirtækjasalan þau að í atvinnulífinu. Árið 2026 eru þau svo komin saman aftur, nú með sameiginlegt markmið um að byggja upp Leikfangaland og heildsölustarfsemina til framtíðar.
„Við þekkjum hvort annað vel og vitum hvað hinn kemur með að borðinu. Það er mikill kostur þegar maður er að fara út í svona verkefni saman,“ segir Stefán.
