Það munar um Miðflokkinn. Þegar stjórnmálamenn taka ákvarðanir um framtíð landsins eiga hagsmunir þjóðarinnar alltaf að vera í forgrunni.
Við verðum að nýta kraft einstaklinganna til að auka verðmætasköpun. Því miður hafa allt of mörg mikilvæg mál setið á hakanum hjá núverandi ríkisstjórn. Þar blasa helst við efnahagsmál, húsnæðismál, orkumál og stjórn á landamærunum. Miðflokkurinn hefur talað skýrt um hverju þarf að breyta og mun taka af festu á þessum málaflokkum.
Samspil þessara málaflokka skiptir máli þegar litið er á stóru myndina. Því er brýnt að draga úr óþarfa ríkisútgjöldum, reka ríkið á ábyrgan hátt og skila hallalausum ríkissjóði. Þannig og aðeins þannig er unnt að senda skilaboð til einstaklinga og fyrirtækja um að vextir og verðbólga muni lækka.
Með auknu lóðaframboði, einfaldara regluverki og auknum hvötum til uppbyggingar á nýju húsnæði mun ungt fólk aftur fá von um að það eigi möguleika á að komast inn á húsnæðismarkaðinn. Allt er það í takt við séreignastefnu Miðflokksins.
Rjúfum kyrrstöðu í orkumálum
Það verður að rjúfa kyrrstöðu í orkumálum. Næg orka er forsenda fyrir velmegun og er Ísland þar engin undantekning. Nýta þarf auðlindir þjóðarinnar til að halda áfram að byggja upp velferð.
Við sem samfélag verðum að eiga heiðarlega og opinskáa umræðu um endurskoðun á lagaumhverfi hælisleitendakerfisins og nýta okkur reynslu annarra Norðurlanda. Við viljum taka vel á móti því fólki sem kemur hingað en það eru þolmörk fyrir því hvað innviðir og samfélagið þolir.
Tökum skynsamlegar ákvarðanir
Það þarf að nálgast rekstur þjóðarbúsins og ákvarðanir þar um eins og langhlaup, taka skynsamar og vel ígrundaðar ákvarðanir sem byggjast á innihaldinu. Við tökum ákvarðanir í dag sem börnin okkar munu uppskera ef vel tekst til. Það munum við í Miðflokknum gera.
Ég hef reynt af fremsta megni að halda heiðri Íslands á lofti og vera ávallt til fyrirmyndar í sundinu. Núna er ég kominn heim fyrir fullt og allt og vil leggja mitt af mörkum til að byggja upp betra samfélag á Íslandi. Alltaf þegar ég hef keppt hef ég haft slagorðið „Áfram Ísland!“ í huga mér og ekkert hefur breyst núna þegar ég er kominn í pólitíkina.
Anton Sveinn McKee,
Hafnfirðingur og er í 4. sæti á lista Miðflokksins í Suðvesturkjördæmi.
