Tvær hafnfirskar konur keppa með landsliðinu í utanvegahlaupum

Heimsmeistaramót á Ítalíu á laugardaginn

Bryndís María og Þórdís Jóna við kort af hlaupaleiðinni.

Heimsmeistaramótið í utanvegahlaupum verður haldið í í Badia Prataglia í Toscani héraðinu á Ítalíu á laugardaginn 10. júní nk. og verður hlaupið ræst klukkan 06:00 að íslenskum tíma.

Landslið Íslands skipa þau: Elísabet Margeirsdóttir, Þórdís Jóna Hrafnkelsdóttir, Bryndís María Davíðsdóttir, Sigríður Einarsdóttir, Kári Steinn Karlsson, Guðni Páll Pálsson, Daníel Reynisson og Birgir Sævarsson.

Landsliðið í utanvegahlaupum f.v.: Elísabet Margeirsdóttir, Þórdís Jóna Hrafnkelsdóttir, Bryndís María Davíðsdóttir, Kári Steinn Karlsson, Guðni Páll Pálsson, Daníel Reynisson og Birgir Sævarsson. Á myndina vatnar Sigríði Einarsdóttur.

Tveir hafnfirskir keppendur

Bryndís María og Þórdís Jóna við íslenska fánann í Badia Prataglia.

Þær Þórdís Jóna (52) og Bryndís María (43) æfa báðar með Hlaupahópi FH og flugu þær utan með hluta af hópnum og þjálfurum í nótt. Þær hafa þegar reimað á sig hlaupskóna og skoða þessa spennandi hlaupaleið á korti. Báðar hafa þær æft mjög vel fyrir keppnina, þær hafa mikla reynslu af utanvegahlaupum og hafa m.a. báðar hlaupið Laugaveginn.

Leiðin er 49,7 km löng en hækkunin eru heilir 2.990 metrar svo hún reynir ár. Lækkunin er jafn mikil og hlaup niður á við reynir ekki síður á hlauparana. Skoða má leiðina hér. Hlaupið er í Foresti Casentinesi þjóðgarðinum en skógurinn er sagður einn sá elsti í Evrópu. Leiðin liggur um skógarstíg og opin svæði með miklu útsýni.

Alls eru fulltrúar 35 landa sem taka þátt í hlaupinu en keppendur eru 272, 112 konur og 160 karlar. Keppt er bæði í einstaklingskeppni karla og kvenna og liðakeppni karla og kvenna.

Heimasíða hlaupsins er http://trailsacredforests.com/en og þar má fylgjast með hlaupinu á hlaupdegi.

Hér má fylgjast með íslensku hlaupurunum.

Sigríði Einarsdóttur má einnig telja Hafnfirðing en hún fæddist á Sólvangi 1966 og bjó í bænum fyrstu 13 árin.

Landsliðshópurinn

Ljósmyndir af Bryndísi og Þórdísi: Einar Ingimundarson.
Ljósmynd af hóp: Af síðu íslenska hópsins.

Hlaupaleiðin

Ummæli

Ummæli