Fjölbreytt verkefni í Skapandi sumarstörfum

Frá fyrsta sameiginlega fundi starfsmanna í Skapandi sumarstörfum 2022.

Sumarið 2021 ákvað Hafnarfjarðarbær í samstarfi við Hamarinn, ungmennahús bæjarins, að endurvekja verkefnið „Skapandi sumarstörf“ sem hafði verið starfrækt nokkur sumur frá 2015.

Býðst einstaklingum og hópum á aldrinum 18-25 ára að koma með hugmyndir að skapandi verkefnum í Hafnarfirði. Valdir hópar fengu tækifæri til að starfa við ýmis skapandi verkefni á ýmsum sviðum lista sem einnig myndu lífga upp á mannlífið í bænum, gleðja ferðamenn og íbúa með einum eða öðrum hætti. Umsækjendur skyldu hafa lögheimili í Hafnarfirði. Meirihluti í hópi sem sækir um þarf að vera með lögheimili í Hafnarfirði eða að verkefnið yrði starfrækt í Hafnarfirði. Einnig var tekið tillit til kynjahlutfalls. Þá er lögð áhersla á að taka inn verkefni og/eða listafólk sem ekki hefur verið með síðast ár.

Helstu verkefni og ábyrgð

Starfsfólki Skapandi sumarstarfa, sem rekið er sem hluti af Vinnuskóla Hafnarfjarðar er ætlað að glæða bæinn lífi, gera hann skemmtilegri, fallegri og fjölbreyttari með listrænum og skapandi uppákomum. Verkefnin eru fjölbreytt og höfða til mismunandi aldurshópa og áhugasviða.

Klara Ósk Elíasdóttir, aðstoðarverkefnastjóri Hamarsins hefur yfirumsjón með Skapandi sumarstörfum 2022 ásamt Margréti Gauju Magnúsdóttir, deildarstjóra ungmennahúsa Hafnarfjarðar. Hver verkefnahópur fyrir sig útvegar sér húsnæði eða aðstöðu til að vinna í, ásamt því að standa straum að öllum tilfallandi kostnaði við vinnslu verkefnanna. Áhersla er lögð á að starfsfólk tileinki sér sjálfstæð og öguð vinnubrögð, haldi vel utan um tímaskipulag og að starfsfólk setji sér raunhæf markmið fyrir sumarið. Markmiðið var ekki bara að bærinn fái að njóta hæfileika þessa unga listafólks heldur einnig að Hafnarfjörður gefi upprennandi hafnfirsku listafólki tækifæri til að vinna að sinni list og undirbúa sig fyrir krefjandi starfsferil sem sjálfstætt starfandi listafólk.

Ellefu einstaklingar taka þátt

Fjörugar umræður voru á fundinum og allir áhugasemir um það sem aðrir voru að gera.

Örlítið færri einstaklingar en í fyrra en jafnmargir hópar. Að sögn Klöru Óskar vildu miklu fleiri taka þátt en niðurskurður varð til þess að ekki gátu fleiri tekið þátt.

Hópurinn hittist í fyrsta sinn í byrjun sumars og kynntu hugmyndir sínar.

  • Kolbrún og Lára ætla að vera með hlaðvarp um bækur skrifaðar af konum.
  • Berglind, Katla, Kolbeinn og Birta ætla að vera með „Strandgate filmfestival“, í Bæjarbíói. Þau munu leika öll atriði, skrifa og skapa. Mælt með glæsilegum klæðaburði enda gert í stíl við Óskarsverðlaunahátíðin en þau segja þeirra verkefni vera nálægt því að vera gjörningur.
  • Magnús ætlar að flytja frumsamda tónlist og taka 5 lög upp. Mun hann fara um miðbæinn og spilar m.a. á kaffihúsum.
  • Sindri teiknar og horfir í það smáa og skordýr eru uppsprettan að teikningum hans. Stefnir hann að sýningu í Apótekinu síðla sumars.
  • Úlfur er að semja strengjakvartett og sækir hann hugmyndir í Hafnarfjörð, hraunið og álfana.
  • Hrafnhildur ætlar að skrifa jóladagatal í kaflaformi og teiknar sjálf og semur textann. Verkefnið heitir „Katla og Leó bjarga jólunum“.
  • Gúa er að semja sína fyrstu EP plötu en hún er að læra tónlist í Danmörku.

Var létt yfir hópnum og allir mjög spenntir að heyra hvað hinir væru að gera og voru þau óspar á spurningar, hrós og hvatningu.

Ummæli

Ummæli