Garðbæingar loka vegi á eigin íbúa og láta þá aka um Hafnarfjörð

Margir virða ekki lokanir á Garðahraunsvegi, sama í hvora áttina ekið er.

Garðabær hefur látið loka gamla Álftanesvegi, nú Garðahraunsvegi við Herjólfsbraut og er umferð þar í gegn nú aðeins heimil strætó og bílum í neyðarakstri.

Þessi lokun, eða öllu heldur áform um lokun, hefur vakið hörð viðbrögð í Hafnarfirði og hafa bæjaryfirvöld í Hafnarfirði mótmælt þeim harðlega í bókun enda er skýlaus krafa um samráð við breytingar á skipulagi sem tengist fleiri en einu sveitarfélagi. Þá hafa íbúa Garðabæjar sem búa á Naustahlein og Boðahlein lýst óánægju sinni með þessa lokun því leiðin í miðbæ Garðarbæjar lengist við þetta um 2,5 km en þessir íbúar þurfa að taka krók út á Álftanes og til baka aftur eftir nýja Álftanesveginum að hringtorgi sem er á Álftanesveginum þar sem nýji vegurinn tengist við þann gamla. Einfaldari leið er einfaldlega að aka í gegnum íbúahverfi í Norðurbænum.

Hér má sjá að búið er að setja skilti um að Garðahraunsvegur sé blindgata.

Margir hafa lýst mikilli undrun og reiði yfir þessari aðgerð og einn íbúi segir að nú þurfi yfirvöld í Hafnarfirði að grípa til sambærilegra ráðstafana, banna hægri beygju af Naustahlein/Boðahlein inn á Herjólfsgötu og banna akstur frá Herjólfsbraut inn Heiðvang ásamt því að loka akbrautinni frá Naustahlein/Boðahlein til bílastæðanna við Hrafnistu.

Garðabær ætlaði jafnframt þessum breytingum að tengja Garðprýði við Garðahraunsveg við þessa lokun, en ekkert bólar á þeirri aðgerð og íbúar í nýjum húsum við Garðprýði eru í raun háðir gatnakerfi Hafnarfjarðar og sama á við um nokkur eldri hús á svæðinu.

Kort af lokuninni má sjá hér.

Í tilkynningu á heimasíðu Garðabæjar segir að þetta sé lokun til frambúðar og muni öll umferð fara um nýja Álftanesveginn héðan í frá. Breytingin sé í samræmi við deiliskipulag þessa svæðis sem samþykkt var af bæjarstjórn Garðabæjar. Deiliskipulagið er þó ekki að finna á Skipulagsvefsjá Skipulagsstofnunar.

Fjarðarfréttir greindi fyrst frá fyrirhugaðri lokun í frétt 7. september 2016 og aftur í frétt 13. október 2016.

 

Ummæli

Ummæli