Sandafellið ÍS 82 stóð eldrautt og nýmálað á dráttarsleðanum tilbúið til að vera sjósett 30. mars 2002 hjá skipasmíðastöðinni Ósey í Hafnarfirði. Um kvöldið var sjósetning reynd á flóði en þá vildi ekki betur til en að dráttarsleðinn festist í brautinni af óþekktum ástæðum.
Var þá skilið við skipið í þeirri stöðu, hann kominn hálfa leið niður. Um nóttina virðist sem vindhviður hafi velt skipinu af sleðanum sem við það fór af brautinni. Lá það þá utan í malarkanti og flæddi vel að því í háflóði.
Svo var hafist handa við að ná sleðanum undan Sandafellinu. Tveir öflugir kranar héldu við skipið með um 65 tonna krafti er annar krani náði sleðanum undan við þó nokkra fyrirhöfn. Var þá flætt nægilega að svo óhætt var að slaka á krönunum tveimur og Sandafellið rétti sig næstum alveg við og var það svo dregið út af Hamri, öflugum lóðsbát Hafnarfjarðarhafnar.
Taka þurfi Sandafellið í slipp til að kanna skemmdir sem ekki voru miklar.
Skipasmíðastöðin Ósey varð gjaldþrota 2005 en síðar um árið keypti Ísfell húsnæði þess og er þar enn með öfluga starfsemi.
