Rekstur Hafnarfjarðarkaupstaðar heldur áfram að styrkjast samkvæmt fjárhagsáætlun bæjarins, en gert er ráð fyrir að rekstrarniðurstaða samstæðunnar (A og B hluta) verði jákvæð um rúma tvo milljarða króna árið 2026. Heildartekjur bæjarins eru áætlaðar rúmir 57,3 milljarðar króna á árinu, sem er aukning frá fyrri árum.
Bærinn hyggst fjárfesta fyrir samtals 10,6 milljarða króna í varanlegum rekstrarfjármunum. Þar af munu tæpir 8,3 milljarðar króna renna til framkvæmda á vegum sveitarsjóðs (A hluta).
4,7 milljarða kr. lántaka
Til að fjármagna þessar framkvæmdir er gert ráð fyrir að taka ný langtímalán að fjárhæð 4,7 milljarðar króna.
Heildarskuldir eru áætlaðar 74,9 milljarðar í lok árs 2026 og því um 130% af tekjum sveitarfélagsins.
Miklar tekjur munu skila sér vegna uppbyggingar, en áætlað er að tekjur af byggingarrétti nemi tæpum 3,2 milljörðum króna og gatnagerðargjöld muni skila tæpum 2,6 milljörðum króna í bæjarsjóð árið 2026.
Fræðslumál áfram stærsti málaflokkurinn
Líkt og fyrri ár vega fræðslu- og uppeldismál þyngst í útgjöldum sveitarsjóðs. Áætlað er að heildargjöld til þess málaflokks verði rúmir 25,7 milljarðar króna árið 2026. Næststærsti málaflokkurinn er félagsþjónusta, þar sem gert er ráð fyrir útgjöldum upp á rúma 10,4 milljarða króna.
Lífeyrisskuldbindingar og launakostnaður
Laun og launatengd gjöld samstæðunnar eru áætluð um 27,1 milljarður króna árið 2026. Auk þess er gert ráð fyrir að breyting á lífeyrisskuldbindingum muni nema rúmum 1,5 milljörðum króna á árinu. Þrátt fyrir þessi gjöld er gert ráð fyrir að handbært fé frá rekstri verði rúmir 2,8 milljarðar króna, sem á að sýna sterka sjóðstreymisstöðu sveitarfélagsins. Þó er handbært fé frá rekstri A-hluta einungis 603 milljónir kr.
Heildareignir Hafnarfjarðarkaupstaðar í árslok 2026 eru áætlaðar rúmir 113,4 milljarðar króna, á sama tíma og eigið fé bæjarins er áætlað um 38,5 milljarðar króna.
Skoða má fjárhagsáætlunina hér.
