Að Einhellu 1 er risinn þjónustukjarni fyrir bíleigendur en þar má finna bensínstöð frá Orkunni, þjónustustöð frá Kletti, skoðunarstöð frá Frumherja og nýja glæsilega þvottastöð frá Löðri.
Þar ræður ríkjum hann Jóhann Sævar Kjartansson sem upplýsti blaðamann Fjarðarfrétta um nýju stöðina.
Stöðin er í rauninni þrískipt, ein stöð sem þrífur stærri bíla, allt frá stórum pallbílum upp í stóra flutningabíla og vörubíla en þetta er fyrsta slíka stöðin í Hafnarfirði.
Þá er ný fullkomin snertilaus þvottastöð fyrir fólksbíla og minni sendibíla og einnig bás þar sem fólk getur sjálft tjöruhreinsað og þvegið bílinn sinn.
Húsbíla- og vörubílaþvottur
Stóra stöðin, trukkastöðin, er mikið mannvirki þar sem bílnum er ekið inn og þvottastöðin þrífur bílinn hátt og lágt. Þar er boðið upp á mjög öflugan undirvagnsþvott, starfsmenn stöðvarinnar skoða hversu skítugur bíllinn er og bæta jafnvel við auka tjöruhreinsi og háþrýstiþvo það sem skítugast er en síðan fer stöðin yfir bílinn með bursta og þrífur bílinn með sápu og að lokum er hann skolaður með afjónuðu vatni sem gerir það að verkum að vatnið rennur betur af honum og bíllinn þornar hratt.
Segir Jóhann að þvottastöðin spari fólki mikinn tíma við að þvo stóra bíla og að verðið sé mjög sanngjarnt. Á meðan blaðamaður var á staðnum kom sendibíll í þvott og þá sást hvað Jóhann og samstarfsmaður hann sýna mikinn þjónustuvilja, en þeir kepptust við að þrífa skítugustu hlutana svo bíllinn færi örugglega tandurhreinn út.
Snertilausa stöðin er opin allan sólarhringinn og hægt er að kaupa áskrift og kostar áskriftin svipað og tveir þvottar en þá er hægt að koma eins oft og maður vill í mánuðinum. Þá er hægt að kaupa áskrift sem gildir fyrir tvo bíla á heimili. Einnig má greiða með Löður appinu.
Jóhann segir viðbrögðin hafi verið mjög góð enda þörf viðbót í Hafnarfirði.
