HS Veitur flytja af Bæjarhrauninu

Flytur starfsemina á Selhellu 8 í sumar

Teikning af nýju húsnæði HS veitna að Selhellu 8

Nýtt glæsilegt húsnæði HS Veitna rís nú að Selhellu 8 þar sem öll starfsemi Hafnarfjarðardeildarinnar verður framvegis en áður hefur starfsemin verið að Bæjarhrauni 14 og að Hjallahrauni 4 en það húsnæði hefur þegar verið selt.

Húsið er teiknað af GP arkitektum.

Júlíus Jón Jónsson, forstjóri HS Veitna hf.

Júlíus Jón Jónsson forstjóri HS Veitna segir í samtali við Fjarðarfréttir að vonast sé til að verkstæðis- og lagerhlutinn verði tilbúinn í maí en skrifstofuhlutinn í júní nk.

„Starfsemin hefur verið á tveimur stöðum, um 200 m² verkstæðishúsnæði að Hjallahrauni 4 sem þegar hefur verið selt og svo svæðisskrifstofa og lager á Bæjarhrauni 14. HS Veitur hafa nýtt neðri hæðina á Bæjarhrauninu sem er tæplega 700 m² en leigt út efri hæðina sem er samtals um 400 m².

Á Selhellu 8 verður um 750 m² lager og verkstæði og um 450 m²  skrifstofu- og starfsmannaaðstaða og síðan er milliloft í hluta húsnæðisins,“ segir Júlíus.

Byggingarframkvæmdir standa nú yfir og ganga vel.

Ástæður fyrir því að ráðist var í þessar breytingar voru voru að sögn Júlíusar nokkrar:

  • Verkstæðið á Hjallahrauni var víkjandi vegna breytinga á deiliskipulagi.
  • Óhagkvæmni fylgdi því að vera á tveimur stöðum með starfsemina.
  • Lagerpláss á Bæjarhrauni var löngu sprungið.
  • Aðkoma að lager á Bæjarhrauni var vægast sagt mjög erfið með alla stærri hluti og ófáir bílar hafa beyglast við þær tilfæringar.
  • Bílastæðavandamál voru mikil og engin úrlausn í sjónmáli.
  • Nýttum ekki sjálfir nema hluta Bæjarhraunsins, hentar ekki vel að vera á tveimur hæðum.

Í Hafnarfirði eru 14 starfsmenn HS Veitna hf.