Pílukastfélag Hafnarfjarðar endurvakið eftir þyrnirósarsvefn

Félagið var stofnað árið 1998

Boðað hefur verið til endurstofnfundar Pílukastfélags Hafnarfjarðar þann 2. mars kl. 20 í Hraunkoti á golfvellinum á Hvaleyri.

Pílukastfélagið var stofnað 7. maí 1998 í félagsmiðstöðinni Vitanum þar sem nú er Bókasafn Hafnarfjarðar.

Af síðu Pílukastsambandsins.

Félagið hefur verið óstarfrækt í mörg ár en er skráð með kennitölu en síðasti formaður þess var Anna Kristín Bjarnadóttir sem varð Íslandsmeistari kvenna í pílukasti.

Félagið hélt m.a. opið Hafnarfjarðarmót í febrúar 2000 þar sem Óli Á. Sigurðsson sigraði. Var félagið þá með aðstöðu til æfinga í Álfafelli. Um tíma átti félagið tvo landsliðsmenn, þá Óla og Sigurð Aðalsteinsson.

Staðsetning fundarins er enn óákveðin en verður upplýst á næstu dögum.

Ingibjörg Magnúsdóttir

Það er Ingibjörg Magnúsdóttir, margfaldur Íslandsmeistari og sigurvegari á Reykjavíkurleikunum sem stendur að endurvakningu Pílufélags Hafnarfjarðar.

Segir hún að félagsgjald verði til bráðabirgða kr. 3.000 en það er sama upphæð og árgjald til Íslenska Pílukastsambandsins.

Kallað verður síðan til aðalfundar í framhaldi af þessum fundi.

Ingibjörg kallar eftir einhverjum sem lumar á gömlu lögum félagsins, eða öðrum gögnum, og hvetur viðkomandi til að hafa samband við sig.

Íslandsmót í 501 verður helgina 6.-7. mars næstkomandi.