„Heyr mitt lag“ er yfirskrift vortónleika Gaflarakórsins og Sandvika Koret sem verða í Víðistaðakirkju á morgun, laugardag kl. 16.
Gaflarakórinn er í sumarskapi þessa dagana. Kórinn tók þátt í kóramóti í Mosfellsbænum þar sem 4 aðrir kórar eldri borgara héldu árlegt kóramót. Í síðustu viku fóru kórfélagar í heimsókn á Sólvang, Hrafnistu og í Drafnarhúsið og sungu fyrir viðstadda.
Um helgina fær kórinn góða heimsókn. Sandvika Koret, kór eldri borgara rá Sandvika í útjaðri Osló kemur og verður með á vortónleikum kórsins í Víðistaðakirkju 24. maí. Stjórnandi kórsins Rebekka Ingibjartsdóttir á ættir að rekja til Hafnarfjarðar en hún er menntuð stjórnandi og söngkona auk þess að leika á fiðlu.
Kórstjóri Gaflarakórsins er Kristjana Þórdís Ásgeirsdóttir tónmenntakennari og tónlistarkennari við Tónlistarskóla Hafnarfjarðar síðastliðin 44 ár. Meðleikari á tónleikunum verður Helgi Már Hannesson.
Kórarnir munu syngja hvor í sínu lagi og síðan tvö lög saman, annað á norsku og hitt á íslensku.
Sungið í Hörpuhorni
Á sunnudag verður förinni heitið í höfuðborgina þar sem kórinn mun syngja í Hörpuhorninu kl. 15.30. Dagskrá þar hefst klukkan 14 og má sjá hana hér.
Starfsárinu lýkur svo með vorferð um Suðurland og messu á uppstigningardag kl. 14 í Hafnarfjarðarkirkju.
Starf kórsins hefst að nýju fyrstu viku í september og þar eru nýir söngfélagar velkomnir.
