Raunverulegar samgöngu­bætur fyrir Hafnfirðinga

Ágúst Bjarni Garðarsson skrifar:

Ágúst Bjarni Garðarsson

Við Hafnfirðingar höfum fundið harkalega fyrir fjársvelti undanfarinna ára þegar kemur að sam­göngu­framkvæmdum á höf­uð­borgarsvæðinu. Hér hefur ríkt algjört stefnuleysi af hálfu ríkisvaldsins í þessum málum og það gaf því augaleið að nauðsynlegt væri að flýta samgönguframkvæmdum verulega hér á svæðinu. Það er því gleðilegt að slíkt sam­komulag hafi nú náðst.

Hver vegur að heiman er vegurinn heim

Auk algjörs stefnuleysis og fjársveltis, fjölgun íbúa á þessu svæði, hefur orðið gríðarleg fjölgun ferðamanna með tilheyrandi auknu álagi á vegi hér innan Hafnarfjarðar. Nær allur þessi fjöldi ferðamanna leggur leið sína með einum eða öðrum hætti í gegnum bæinn. Stóraukið álag á Reykjanesbrautina, einu leiðina inn og út úr landinu, hefur þýtt aukið álag á innanbæjarvegi Hafnarfjarðar; bæði í gegnum mið­bæinn og svo í gegnum Setbergið. Þetta þekkjum við íbúar auðvitað mjög vel og þá sérstaklega íbúar Setbergs­hverfisins á leið sinni inn og út úr hverf­inu á álagstímum.

Tímamóta­samkomu­lag ríkis og sveitarfélaga

Nú hefur náðst samkomulag milli ríkis og sveitarfélaga á höfuðborgarsvæðinu um fjárfestingu til samgönguframkvæmda fyrir 120 milljarða króna á næstu 15 árum. Þar er m.a. að finna raunverulega lausn á þeim vanda sem ég nefni hér að ofan og hefur fjármagn verið aukið verulega til verkefnisins; fer úr 5 milljörðum í 13 milljarða, auk þess sem verkefnið er tímasett. Við Hafnfirðingar munum því sjá góða lausn á næstu árum, alveg frá Álftanesvegi að Lækjargötu. Fyrir mitt leyti hefði ég aldrei komið að slíku samkomulagi nema lausn sem þessi hefði náð fram að ganga og verið hluti af samkomulaginu. Samgönguráðherra á mikið hrós skilið fyrir sína vinnu og við Hafnfirðingar fáum loks þær samgöngubætur sem við höfum svo lengi beðið eftir.

Álögur eiga ekki að hækka

Ef fram heldur sem horfir mun umferð aukast um 40% á næstu 15 árum og tafir um 25%. Það er því mikil­­vægt að tryggja greiðari sam­göngur og fjölbreyttari ferðamáta ásamt sérstakri áherslu á umferðaröryggi og að draga úr slysum á fólki. Álögur á eigendur ökutækja eiga ekki að hækka og verða meiri en nú er, þó svo að gjaldheimta kunni að taka breytingum vegna orkuskipta í samgöngum. Þetta er að mínu mati grundvallaratriði ef nást á sátt um þá leið sem hér er boðuð í þessu góða tímamótasamkomulagi sem náðst hefur milli ríkis og sveitar­félaga.

Ágúst Bjarni Garðarsson, formaður bæjarráðs.

Greinin birtist í 36. tbl. Fjarðarfrétta, 16. október 2019.

Ummæli

Ummæli