Meirihlutinn í Hafnarfirði skilar nær auðu í úthlutunum lóða til uppbyggingar íbúða þrátt fyrir gríðarlega þörf!

Friðþjófur Helgi Karlsson skrifar

Friðþjófur Helgi Karlsson

Við upphaf kjörtímabilsins var nóg af tilbúnum lóðum í Skarðshlíð sem biðu þess að uppbygging hæfist á þeim. En andvara- og fram­taks­leysi meirihlutans hefur verið átakanlegt. Hann er bú­inn að sitja á þessum til­búnu lóðum of lengi, enda­lausar breytingar á skipulagi hafa m.a. tafið uppbyggingu í Skarðshlíðinni. Slíkt er óásætt­an­legt í þeirri stöðu sem nú er uppi eða er ekki mark­miðið að draga úr hækkun fasteignaverðs með úthlutun á lóðum til almennings og byggingarverktaka? Það er kannski vilji meirihlutans að stuðla enn að hækkun fasteignaverðs með því að halda að sér höndum þannig að al­­menningur blæði en fasteignafélög fitni.

Þess má geta að Samtök iðnaðarins gáfu nýverið út tölur yfir íbúðir í byggingu á höfuðborgarsvæðinu í september síðastliðnum og báru þær saman við tölur frá febrúar í fyrra. Þar kom í ljós að íbúðum í byggingu hafði fjölgað alls staðar, nema í Hafnarfirði. Þar hafði þeim fækkað um nærri þrjátíu prósent.

Reykjavík úthlutaði á síðasta ári lóðum undir fimmfalt fleiri íbúðir en næstu tvö ár á undan eða samanlagt alls 1711 lóðum undir íbúðir. Þá hefur Reykjanesbær úthlutað fleiri lóðum en Kópavogur og Hafnarfjörður samanlagt frá síðustu kosningum þar af 541 lóð í fyrra.

Úr skýrslu Arionbanka um húsnæðismarkaðinn frá 31. janúar 2018

Til samanburðar var úthlutað í fyrra 66 lóðum undir íbúðir hér í Hafnarfirði.

Hafnarfjörður á ólíkt mörgum öðrum sveitarfélögum á höfuðborgarsvæðinu bæði tilbúnar lóðir til úthlutunar sem og talsvert land undir nýjar íbúðir. Eins eru fjölmörg tækifæri til þéttingar og endurskipulagningar byggðar m.a. á Hraununum en gengið hefur allt of hægt að vinna að nýju skipulagi á því svæði.

Á meðan eru þéttingarverkefni á blússandi siglingu í nokkrum nágranna­sveitarfélögum okkar m.a. í Kópa­vogi þar sem uppbygging er hröð í kringum Smáralindina bæði sunnan og austan megin við hana.

Annað sem veldur áhyggjum er að litlar sem engar áætlanir eru fyrir hendi hjá meiri­hlutanum í Hafnarfirði varðandi uppbyggingu á hagkvæmu hús­næði á vegum húsnæðisfélaga. Til samanburðar er Reykjavík að huga mjög að þessu mikil­væga og brýna hagsmunamáli sérílagi fyrir fjölskyldur með lægri- og millitekjur og ungt fólk sem er að stíga sín fyrstu skref á hús­næðismarkaði. Þar má sjá af tölum að af þeim rétt rúmlega 1700 lóða­úthlutunum sem áttu sér stað í fyrra voru hátt í 1000 úthlutanir til félaga á borð við Félags­stofnun stúdenta, Byggingafélag náms­manna, Samtök aldraðra, Félags­bústaði, Sjómannadags­ráð, Brynju hús­sjóð ÖBÍ og Bjarg hús­næðis­sjálfseigna­félag ASÍ og BSRB.

Það er ljóst að betur má ef duga skal hvað þessi mál varðar hér í Hafnarfirði. Þetta mikla hagsmunamál er brýnt og ljóst að hægt hefði verið að gera mun betur á því kjörtímabili sem nú er að líða. Það skyldi þó ekki verða kosningamál í vor að standa betur að þessum málum en gert hefur verið á umliðnum fjórum árum hér í bæ. Því oft var þörf en nú er nauðsyn! Að skila nær auðu í þessum málum er ekki í boði!

Friðþjófur Helgi Karlsson
varabæjarfulltrúi Samfylkingarinnar og fulltrúi í umhverfis- og framkvæmdaráði.

Ummæli

Ummæli

Skilja eftir athugarsemd

Please enter your comment!
Please enter your name here