Hafnfirðingar vilja ekki vera sóðar

Árni Þór Finnsson skrifar

Árni Þór Finnsson

Bæjarlistanum er annt um umhverfið og vill hafa bæinn sinn snyrtilegan og lausan við rusl á víð og dreif. Gera þarf átak í fjölgun ruslatunna á göngustígum bæjarins, við leiksvæði og í almenningsgörðum.

Það er staðreynd að stór hluti sorps endar því miður í náttúrunni. Fyrir utan hvað rusl, sér í lagi plastumbúðir, í runnum, görðum, á göngustígum og tjörnum er mikið útlitslýti á annars fallegu umhverfi þá getur það beinlínis haft skaðleg áhrif eftir því sem það brotnar niður, í litlar agnir sem kunna að enda í lífverum sem síðan vinnur sig hægt og bítandi upp fæðukeðjuna með afleiðingum á heilsu fólks og dýra.

Af þessu tilefni er kjörið að minna á Stóra Plokkdaginn, sunnudaginn 24. apríl nk. Drífum okkur út og tínum rusl í okkar nærumhverfi og víðar ef sá gállinn er á ykkur.

Hjálpumst að við að hafa bæinn okkar snyrtilegan og með fjölgun ruslatunna.

Árni Þór Finnsson,
skipar 3. sæti á Bæjarlistanum

Ummæli

Ummæli