Eldað í Hafnarfirði, næringarríkar og ferskar máltíðir fyrir börn og unglinga í Hafnarfirði

Sævar Gíslason skrifar

Sævar Gíslason

Á næsta kjörtímabili tekur við nýr áfangi verði Miðflokkurinn kjörinn til áhrifa í Hafnarfirði. Miðflokkurinn ætlar að innleiða á kjörtímabilinu skólamat eldaðan í Hafnarfirði gæti verið verkefni útfært sem miðlægt eldhús eða matur eldaður í skólum bæjarins, en með því má tryggja ungum börnum aðgengi að hollum, ferskum og fjölbreyttum mat. Núna sér hagnaðardrifið fyrirtæki um mat fyrir skólana. Framleiðsla matarins fer fram í öðru bæjarfélagi í sirka 40 km fjarlægð frá skólum Hafnarfjarðar og matur er búinn til eldsnemma á morgnana og keyrður í skólana oft á tíðum eða ekki alltaf milli 09:00 – 10:00 og bíður í hitakassa fram á matmálstíma í hádegi. Það geta flestir nú áttað sig á að með slíku fyrirkomulagi er máltíðin ekki uppá marga fiska hvað varðar bragð og næringargildi.

Með miðlægu, óhagnaðardrifnu eldhúsi eða eldað í skólum allt í umsjá bæjarins mætti draga úr kostnaði, auka gæði matar og ferskleika, því með okkar hugmyndum yrðu gæðin tryggð með faglegu eftirliti með uppruna hráefnis og framleiðsluferli máltíða. Ég tel einnig að börn myndu síður fúlsa við mat sem er vel útilátinn, næringarríkur, heitur og girnilegur en það sem er í boði nú. Með slíku fyrirkomulagi er lagður grunnur að betri heilsu og vellíðan í leik og starfi.

Það liggja fyrir ítarlegar rannsóknir um mikilvægi góðrar næringar. Án næringar verður lítið um orku til hreyfingar. Á vef Embættis landlæknis með yfirskriftina „Heilsueflandi grunnskóli“, kemur fram að samkvæmt Aðalnámskrá grunnskóla (2011) er Heilbrigði og velferð nú einn af sex grunnþáttum menntunar og að það er næringin sem ber uppi hreyfinguna auk þess sem varnir gegn vímuefnum, ofbeldi og slysum voru ítrekaðar.

Miðflokkurinn vill vellíðan fyrir alla og stuðla að því að grunnskólabörn geti stundað nám sitt öll södd og glöð til framtíðar.

Sævar Gíslason,
varamaður í fjölskylduráði og skipar 3. sæti á lista Miðflokksins og óháðra í komandi sveitastjórnarkosningum.

Ummæli

Ummæli