Síðastliðinn þriðjudag var ritað undir verksamning milli Hafnarfjarðarbæjar, Eyktar og Sörla um byggingu nýrrar reiðhallar fyrir Sörla.
Framkvæmdir eiga að hefjast í apríl 2023 og áætlað er að þeim ljúki árið 2025. Áætlanir gera ráð fyrir því að reiðgólf hallarinnar verið tilbúið til notkunar í janúar 2024, þó áfram verði unnið í öðrum hlutum verksins.
„Ný reiðhöll mun gjörbreyta öllu hjá félaginu okkar og vonandi líka fyrir mótahald innandyra á höfuðborgarsvæðinu því gert er ráð fyrir því að knapar geti hitað upp í gömlu höllinni og riðið síðan beint inn í nýju höllina til keppni og jafnvel leggja hesta á skeið frá gömlu reiðhöllinni um tengibygginguna inn í nýju reiðhöllina,“ segir í tilkynningu frá Sörla.
„Sörlastaðir og vallarsvæðið okkar er sérstakt á landsvísu og þekkja það allir sem hafa komið og fylgst með mótum og kynbótasýningum, hve gaman er að sitja þar í góðum félagsskap og fylgjast með frá 2. hæð núverandi hallar. Nýja byggingin mun færa okkur enn nær vellinum og stærri og fleiri gluggar munu enn auka á þennan frábæra möguleika. Hugmynd hönnuða og okkar í Sörla var að láta inni- og útiáhorfendaaðstöðu renna saman og verður hægt að ganga þaðan út á hellulagða stétt ofan við nýja áhorfendabrekku við völlinn.“
Örfáar lausar hesthúslóðir er til á svæðinu samkvæmt gildandi deiliskipulagi, þetta eru reyndar síðustu lóðirnar sem í boði verða á svæði Sörla og ekki auðvelt að sjá að hægt verði að bæta við síðar að mati Sörla.
Kostar 1,4 milljarða
Á fjárhagsáætlun Hafnarfjarðar fyrir 2023-2025 er áætlaðar 1.395 milljónir kr. til heildarverksins en verksamningurinn við Eykt hljóðar upp á rúmar 1.328 milljónir kr. sem er 8,7% yfir kostnaðaráætlun. Upphaflegt tilboðið, sem var eina tilboðið í verkið, var 15,9% yfir kostnaðaráætlun en með samningum náðist að lækka samningsupphæðina um tæpa 88,1 milljón kr.
- Uppgröftur á lausum jarðvegi 7.000 m³
- Losun klappar 900 m³
- Fyllingar 14.800 m³
- Mótasmíði 5.600 m²
- Bendistál 105 tonn
- Steinsteypa 1.225 m³
- Stálvirki 201 tonn
- Lagna- og loftræsikerfi
- Frágangur innanhúss
- Frágangur utanhúss
- Færsla veitulagna 1.560 m
