Helmingur barna í leikskólum hverju sinni

Hvert barn mætir 2 daga aðra vikuna og 3 daga hina vikuna

Í tilkynningu til foreldra og forráðamanna í leikskólum Hafnarfjarðar segir að óvæntar aðstæður í samfélaginu kalli á breytt skipulag leikskólastarfs, sem muni taka talsverðum breytingum í því samkomubanni sem lagt hefur verið á og tekur gildi frá miðnætti í kvöld.

Óhjákvæmilega felur það í sér að leikskólastarf getur ekki verið með sama hætti og áður og ný framkvæmd á leikskólastarfinu tekur tímabundið við frá þriðjudeginum 17. mars.

Mánudaginn 16. mars verður skipulagsdagur í leikskólum og aðeins starfsfólk mætir í skólana. Síðdegis þann dag mun hver skóli senda foreldrum nánari upplýsingar um framkvæmd leikskólastarfsins frá og með þriðjudeginum og næstu fjórar vikur.

Leikskólastjórar hafa fengið nákvæma vinnuáætlun um þá framkvæmd sem tekur gildi á morgun – sem mun verða eins fyrir alla leikskóla Hafnarfjarðar sem og starfsmenn þeirra. Sú áætlun byggir á sameiginlegri yfirlýsingu frá Sambandi íslenskra sveitarfélaga sem skrifstofa mennta og lýðheilsusviðs Hafnarfjaðrar tók þátt í að móta núna um helgina. Í þeirri áætlun er reynt að taka á sem flestum þáttum er varða leikskólastarf. Mælst er til þess að þeim grunnviðmiðum sem settar eru sé ekki breytt.

Starfsfólk leikskólanna vinnur að útfærslunni á morgun mánudag og í lok skipulagsdagsins munu foreldrar fá frá hverjum skóla hvernig þessi útfærsla verður fyrir sitt/sín/börn.

Hér eru þau atriði sem samræmd eru í öllum leikskólunum

  • Helmingur barna verður samtímis í leikskólanum, systkini fylgjast að
  • Opnunartími verður 7:30-16:15
  • Hvert barn mun fá skerta dvöl í leikskólanum
  • Hvert barn mætir 2 daga aðra vikuna og 3 daga hina vikuna
  • Aðgengi foreldra inn í leikskólann verður mjög takmarkað.
  • Foreldrar hafa einungis aðkomu í fataherbergi leikskólans og staldrar þar við eins stutt og mögulegt er, án þess þó að valda barni sínu streitu. Miðað er við að einungis fáir foreldrar séu í fataherbergi í einu og aðeins einn aðili frá hverju barni
  • Foreldrar eru beðnir um að snerta ekki hluti í fataherbergi að óþörfu og helst ekki annað en fatahólf síns barns og eigur þess.
  • Foreldrar eiga að tæma hólf barnanna daglega
  • Foreldar gæti fyllsta hreinlætis hvað varðar fatnað barna, bæði inni og útifatnað enda liggja fatahólf þétt saman. Þetta á einnig við um aðrar eigur barnanna.
  • Finni foreldri fyrir flensueinkennum er það beðið um að koma ekki inn í leikskólann
  • Börn eiga ekki að koma með leikföng að heiman inn í leikskólann

Ummæli

Ummæli