Rauð viðvörun vegna veðurs á morgun á höfuðborgarsvæðinu

Veðurstofan spáir aftakaveðri og hefur gefið út rauða viðvörun

Búist er við aftakaveðri á morgun og Veðurstofan hefur gefið út rauða viðvörun fyrir suð-vesturland og suðurland. Spáð er austanátt með slyddu og síðan rigningu og 15 – 28 m/s vindur í Hafnarfirði skv. veðurspá Bliku.

Þar er spáð að mesti vindurinn verði um kl. 8 í fyrramálið en vindurinn verði kominn nálægt 10 m/s um kl. 18 og þá fari vindátt að verða suðlægari.

Að sögn Einars Sveinbjörnssonar veðurfræðings hjá Bliku nýtur Hafnarfjörður nokkurs skjóls í austanátt en líklegast muni íbúar á Völlum og í efstu byggðum Setbergs finna einna helst fyrir veðrinu. Þá segir hann að hætta geti verið á grjótfoki þar sem unnið er við breikkun Reykjanesbrautar og hvetur fólk að vera ekki á ferli þar þegar veðurhæðin er mest.

Ef veðrið verður jafn slæmt og spáð er má búast við að björgunarsveitir verði kallaðar út

Spá Veðurstofunnar

Vaxandi austanátt (Gult ástand)
14. feb. kl. 02:00 – 05:00
Vaxandi austanátt, 15-23 m/s og snarpar vindhviður á Kjalarnesi sem geta verið varhugaverðar fyrir vegfarendur með aftanívagna eða á ökutækjum sem taka á sig mikinn vind. Einnig geta verið hvassir sviptivindar í efribyggðum og við háar byggingar. Fólk er hvatt til að sýna aðgát og ganga frá lausum munum til að forðast tjón.

Austan rok eða ofsaveður (Appelsínugult ástand)
14. feb. kl. 05:00 – 07:00
Austan 15-28 m/s, hvassast við ströndina og efri byggðum. Samgöngutruflanir eru líklegar á meðan veðrið gengur yfir og truflanir á flugsamgöngum. Hætt er við foktjóni og eru byggingaraðilar hvattir til að ganga vel frá framkvæmdarsvæðum. Búast má við hækkandi sjávarstöðu vegna áhlaðanda og líkur á að smábátar geta laskast eða losnað frá bryggju. Fólki er bent á að ganga vel frá lausum munum og sýna varkárni.

Austan ofsaveður (Rautt ástand)
14. feb. kl. 07:00 – 11:00
Austan 20-30 m/s, á höfuðborgarsvæðinu og í nálægum sveitarfélögum. Örfá hverfi eru í þokkalegu skjóli fyrir austanátt og veðrið nær sér því síður á strik þar. Búast má við samgöngutruflunum á meðan veðrið gengur yfir og að flugsamgöngur leggist af. Hætt er við foktjóni og eru byggingaraðilar hvattir til að ganga vel frá framkvæmdarsvæðum. Búast má við hækkandi sjávarstöðu vegna áhlaðanda og líkur á að smábátar geta laskast eða losnað frá bryggju. Fólki er bent á að ganga vel frá lausum munum og sýna varkárni.

Austan rok eða ofsaveður (Appelsínugult ástand)
14. feb. kl. 11:00 – 15:00
Austan 15-28 m/s, hvassast við ströndina og efri byggðum. Samgöngutruflanir eru líklegar á meðan veðrið gengur yfir og truflanir á flugsamgöngum. Hætt er við foktjóni og eru byggingaraðilar hvattir til að ganga vel frá framkvæmdarsvæðum. Búast má við hækkandi sjávarstöðu vegna áhlaðanda og líkur á að smábátar geta laskast eða losnað frá bryggju. Fólki er bent á að ganga vel frá lausum munum og sýna varkárni.