Þar sem unglingar með erfiðleika áttu að dvelja í heimavistarskóla er nú rekin blómleg starfsemi til að hjálpa fólki með mikinn vímuefnavanda. Að þessari starfsemi standa Krýsuvíkursamtökin sem fögnuðu 30 ára afmæli sínu á laugardaginn.
Þangað komu velunnarar samtakanna sem eru margir, einstaklingar, félagasamtök og fyrirtæki og var þeim tekið með virktum. Hnallþórur, kleinur og rjúkandi kaffi var í boði og fólk spjallaði um góða veðrið og næstu skref.
Mikið hefur áunnist á síðustu árum við að bæta aðstöðuna en húsið var orðið mjög illa farið. Enn á þó eftir að endurnýja þak hússins sem er orðið ónýtt og lekur. Er nú verið að safna fyrir nýju þaki um leið og áherslan á merðferðarúrræði gleymist ekki.
Meðferðin hefur verið í stöðugri þróun síðan haustið 1997 og er það eitt af aðaleinkennum hennar að taka endalausum breytingum dag frá degi. Þessi mikli sveigjanleiki í innra starfi gerir það að verkum, að auðveldara er að mæta þörfum skjólstæðinga, mun meir en gengur og gerist í almennum meðferðum og veitir sértækum úrræðum meira rými til aðgerða.
Forstöðumaður heimilisins er Þorgeir Ólason en framkvæmdastjóri samtakanna er Lovísa Christinasen en hún fékk fálkaorðuna árið 2011 fyrir störf í þágu áfengis- og vímuefnaneytenda.
Sjá nánar hér: www.krysuvik.is
