Hjartasteinn til heiðurs leikaranum, söngvaranum, tónskáldinu og skemmtikraftinum og Gaflaranum Þórhalli Sigurðssyni var lagður í gangstéttina fyrir framan Bæjarbíó sl. fimmtudag.
Hjartasteininn hlýtur Laddi fyrir leikinn, gleðina og skemmtunina sem hann hefur fært öllum aldurshópum um allt land um árabil.
Nánasta fjölskylda og fjölmargir aðdáendur Ladda voru viðstaddir afhjúpun hjartasteinsins þar sem 50 barna kór Öldutúnsskóla söng lag sem Laddi gerði frægt á Íslansku, Snjókorn falla en Jónatan Garðarsson gerði íslenska textann.
Valdimar Víðisson, formaður bæjarráðs aðstoðaði Ladda við afhjúpunina sem var mjög hrærður, var aldrei þessu orðlaus og sagði einfaldlega takk.
Þessa dagana stendur yfir sýning í Bæjarbíói sem kennd er við þá félaga og byggir að hluta til á 75 ára afmælissýningu Ladda.
Landskunnur Gaflari
Laddi er landsmönnum flestum að góðu kunnur og þá ekki síst fyrir sköpun sína á fjöldanum öllum af karakterum sem margir kannast við. Eiríkur Fjalar, Saxi læknir, Skúli rafvirki, Magnús bóndi, Elsa Lund og Marteinn Mosdal eru meðal þessara karaktera og vilja margir meina að einhverjir þeirra séu fæddir í brandarabænum Hafnarfirði líkt og Laddi sjálfur. Laddi hefur gefið út plötur, leikið í kvikmyndum og tekið þátt sem handritshöfundur og/eða leikari í áramótaskaupum og fjölda þátta sem yljað hafa andann og glatt hafa landann um áratuga skeið. Laddi tók þátt í stofnun Spaugstofunnar árið 1985 og starfaði með hópnum fyrstu árin. Meðal hans helstu afreka eru Heilsubælið, Stella í orlofi, Stella í framboði, Löggulíf, Magnús, Regína, Íslenski draumurinn, Amma Hófí og ljúfsáru gamanþættirnir Jarðarförin mín og Brúðkaupið mitt hvar fæðingarbærinn Hafnarfjörður er í lykilhlutverki. Laddi hefur einnig talsett mikinn fjölda kvikmynda og teiknimynda og afrekaði það m.a. að talsetja allar teiknimyndirnar um Strumpana einn síns liðs.
Fagnar stórafmælunum með fjöldanum
Frægustu verk Lagga í leikhúsi eru líklega Fagin í Óliver Twist og Tannlæknirinn í Litlu Hryllingsbúðinni. Laddi var í tvíeykinu Halla og Ladda ásamt bróður sínum Haraldi Sigurðssyni og nutu þeir bræður gríðarlegra vinsælda á áttunda áratug tuttugustu aldar. Platan „Látum eins og ekkert C“, sem unnin var með Gísla Rúnari Jónssyni, er líklega þekktasta plata þeirra. Á níunda áratugnum stofnuðu Halli og Laddi HLH-flokkinn ásamt Björgvini Halldórssyni. Laddi hóf tónlistarferil sinn sem trommari í hljómsveitinni Föxum og hefur á sínum ferli samið fjölda laga sem mörg hver hafa náð miklum vinsældum, t.d. Sandalar, Austurstræti og Búkolla. Í seinni tíð hefur Laddi fagnað stórafmælum sínum meðal annars í faðmi fjöldans með Laddi 6-tugur í Borgarleikhúsinu, Laddi 7tugur í Hörpunni og Laddi 75 í Háskólabíó.
