Framkvæmdir við Suðunesjalínu 2 munu hefjast aftur á næstu dögum.
Þetta kemur fram í tilkynningu frá Landsneti.
Gert er ráð fyrir línunni á aðalskipulagi allra sveitarfélaga á leiðinni ásamt svæðisskipulagi og hafa öll fjögur sveitarfélögin á línuleiðinni samþykkt framkvæmdaleyfi.
Samið hafði verið við um 96% af landeigendum en ráðuneyti umhverfis- orku- og loftslagsmála hefur heimilað eignarnám á þeim jörðum sem ekki hafa náðst samningar við.
Búið er að leggja stærsta hluta línuvegar sem liggur í landi Hafnarfjarðar en eftir er um einn kílómetri en Suðurnesjalína 1 og 2 munu liggja samhliða frá landamerkjum Hafnarfjarðar og Voga.
Byrjað verður á slóðagerð og í kjölfarið verður borað fyrir stagfestum og undirstöður settar niður. Öllum helstu innkaupum og útboðum er lokið og möstur, leiðarar og annað efni komið í framleiðslu.
Stefnt er að því að línan verði tekin í rekstur haustið 2025.
Byrjað var á hluta framkvæmdarinnar fyrir tveimur árum á milli Rauðamels og Fitja við byggingu nýs tengivirkis á Njarðvíkurheiði, strenglagnar til Fitja og reisingu Reykjaneslínu 1 milli Njarðvíkurheiðar og Rauðamels. Gert er ráð fyrir að þessum hluta framkvæmda verði lokið í kringum næstu áramót.
Í tilkynningu frá Landsneti segir að með tilkomu Suðurnesjalínu 2, Reykjaneslínu 1 og spennistöðvar á Njarðvíkurheiði verði flutningskerfið sveigjanlegra í rekstri og afhendingaröryggi á Suðurnesjum aukist til muna. Nægjanleg flutningsgeta verði til ráðstöfunar sem geti mætt stærri frávikum þegar stórar framleiðslueiningar eða stærri notendur aftengjast kerfinu skyndilega eða til lengri tíma t.d. vegna viðhalds.
