Flestum aðalfundum frestað – FH heldur þó sinn á morgun

Nýjasta íþróttahúsið, Skessan.

Útbreiðsla COVID-19 veikinnar hefur haft gífurleg áhrif á allt félagsstarf, ekki síst eftir að samkomubann var sett á sl. mánudag auk fyrirmæla um að halda skuli 2 metra fjarlægð á milli fólks á minni samkomum.

Því hafa flest félög frestað viðburðum og aðalfundum félaga hefur verið frestað og það á líka við um fjölmörg stórfyrirtæki.

„Við höfum þegar tilkynnt að öllum fundum, þar með aðalfundi félagsins verður frestað um óákveðinn tíma,“ segir Magnús Gunnarsson, framkvæmdastjóri Hauka, en þar liggur allt barnastarf niðri eins og er og fylgt er fyrirmælum sóttvarnarlæknis og bæjaryfirvalda sem og þeim áherslum sem ÍSÍ hefur lagt til. „Þessi mál eru hins vegar til umræðu hjá okkur á hverjum degi og geta eðlilega tekið breytingum, en þá er alltaf horft til þeirra forvarna gegn veirunni sem sóttvarnarteymið leggur til,“ segir Magnús að lokum.

Aðalfundur FH verður hins vegar skv. áætlun kl. 18 á morgun, fimmtudag og sagði Viðar Halldórsson, formaður FH, í samtali við Fjarðarfréttir að stjórnin hafi talið það forsvaranlegt enda verði stólum raðað upp með tveggja metra millibili. Sagðist hann samt skilja áhyggjur þeirra sem ekki treystu sér til að mæta og bjóst Viðar við dræmari þátttöku en oft áður.

Heyrst hafa óánægjuraddir með það að halda eigi aðalfundinn og einn FH-ingur sem er fulltrúi deildar segist ekki treysta sér til að mæta þar sem í fjölskyldu hans er einstaklingu með undirliggjandi sjúkdóm og því mjög viðkvæmur fyrir smiti. Fulltrúi annarrar deildar sagðist ekki heldur ætla að mæta og undraðist mjög að fundurinn yrði haldinn.