Fjögurra milljarða erlend fjárfesting í stækkun líftæknifyrirtækisins Algalífs

Orri Björnsson forstjóri segir að framleiðsla á astaxanthíni muni rúmlega þrefaldast

Orri Björnsson, forstjóri Algalíf Iceland

Ákveðið hefur verið að rúmlega þrefalda framleiðslu á astaxanthíni hjá líftæknifyrirtækinu Algalíf í Reykjanesbæ sem Hafnfirðingurinn Orri Björnsson stýrir.

Er það gert með því að stækka verksmiðju fyrirtækisins um rúmlega helming. Hafist verður handa strax í upphafi næsta árs og rúmlega 100 störf munu skapast á framkvæmdatímanum fram til 2022.

Byggðir verða um 7.000 m² og húsnæðið fer því úr 5.500 m² í um 12.500 m². Ársframleiðslan fer úr rúmum 1.500 kg af hreinu astaxanthíni í rúm 5.000 kg.

Erlend fjárfesting vegna verkefnisins nemur um fjórum milljörðum króna.

„Ársveltan mun nærri fjórfaldast eftir stækkun og fara úr einum og hálfum milljarði króna í um fimm og hálfan milljarð,“ segir Orri Björnsson, forstjóri Algalífs.

Sérhæft og vel menntað starfsfólk heldur framleiðslukostnaði Algalífs í skefjum með nýsköpun og nýtingu hátæknilausna á öllum stigum, að sögn Orra. Því sé náttúrulegt astaxanthín frá Algalíf mjög vel samkeppnishæft  á alþjóðamarkaði og sala gangi mun betur en upphaflegar áætlanir gerðu ráð fyrir.

„Öll framleiðsla þessa árs er löngu seld og bróðurpartur framleiðslu næsta árs líka. Markaðshorfur eru mjög góðar og fjögurra milljarða erlend fjárfesting sýnir trú á því sem við erum að gera,“ segir Orri.

Öll framleiðsla Algalífs á örþörungum fer fram í stýrðu umhverfi innanhúss með umhverfisvænum orkugjöfum, eru bæði magn og gæði stöðug. Úr þörungunum er unnið fæðubótaefnið astaxantín. Algalíf hefur getið sér gott orð á alþjóðavettvangi fyrir sjálfbærni, gæði og afhendingaröryggi.

Framleiðsla Algalífs á astaxanthíni úr örþörungum er umhverfisvæn og ekkert jarðefnaeldsneyti er notað í ferlinu. Notast er við sérstök LED ljós og tölvustýrð ljósa- og hitakerfi við ræktun örþörunganna í lokuðum rörakerfum sem þýðir að vatns-, raforku- og landnotkun er í lágmarki.

Binding á koltvísýringi er 80 tonn á ári en vrður 250 tonn á ári og kolefnisfótsporið neikvætt sem því nemur. Náttúrlegt astaxanthin frá Algalíf er alþjóðlega vottað af Non-GMO Project.

Ummæli

Ummæli