Lífsgæðasetur St. Jó. formlega opnað – MYNDIR

Búið að taka eina hæð í notkun og fjölmargt í boði

Eva Rún Michelsen, verkefnastjóri flytur ávarp.

Lífsgæðasetur St. Jó er samfélag sem býður upp á forvarnir, heilsuvernd, snemmtæka íhlutun, fræðslu og skapandi setur. Það var formlega opnað sl. fimmtudag og síðan var opið hús og fjölmenntu bæjarbúar.

Athöfnin var haldin framan við húsið við ófullgerðan innganginn.

Við setninguna ávarpaði hr. Guðni Th. Jóhannesson, forseti Íslands viðstadda, Rósa Guðbjartsdóttir bæjarstjóri ávarpaði gesti og Björn Pétursson bæjarminjavörður rakti sögu hússins.

Allir rekstraraðilar eiga það sam­eiginlegt að vilja auka lífsgæði fólks með einum eða öðrum hætti. Lífs­gæðasetrið er sjálfbær eining rekin af Hafnarfjarðarbæ. Eva Michelsen, er verkefnastjóri Lífsgæðasetursins.

Þegar eru tólf aðilar komnir í húsið auk Leikfélags Hafnarfjarðar sem fær til eins árs að nýta kapelluna undir starfsemi sína. Þarna má m.a. finna fólk sem sinnir markþjálfun, sálgæslu, heilsu­eflingu, fjölskyldumeðferð, kvíða­­meðferð, fræðslu og jóga.

Húsnæðið er hið glæsilegasta og vel hefur tekist til við endurbætur innanhúss. Aðalinngangur hússins er þó ekki enn tilbúinn en þar var mikil viðbygging rifin og inngangurinn færður í fyrra horf.

Á opnunardaginn voru nákvæmlega 93 ár síðan húsið var vígt sem St. Jósefsspítali, en það var 5. september 1926. Spítalastarfsemi lagðist af í húsinu árið 2011 en Hafnarfjarðarbær eignaðist húsnæðið 2017 og skuldbatt sig til að reka almannaþjónustu í fasteigninni.

Eftirtaldir aðilar eru í húsinu auk Leikfélags Hafnarfjarðar sem er í kapellunni:

  • Eldmóður fræðasetur: býður upp á markþjálfun fyrir alla, kynlífsmarkþjálfun og forvarnarfyrirlestra
  • Hugarró: er fyrirtæki sem einblínir á að hjálpa fólki að finna innri ró eftir áföll og styrkja sig innan frá. Friederike Berger er Kundalini jógakennari og núvitundarheilari og mun kenna hóptíma í Kundalini jóga og taka að sér einkatíma í núvitundarheilun.
  • Janus heilsuefling: Janus heilsuefling er ráðgjafa- og þjónustufyrirtæki sem vinnur að bættri heilsu og betri lífsgæðum eldri borgara.
  • Lex familia: Fjölskyldumeðferð til að takast á við margvíslegan vanda sem upp geta komið i fjölskyldum eða hjá einstaklingum ásamt lögfræðiaðstoð sem lítur að fjölskyldurétti þegar tekist er á um ýmis álitarefni sem upp geta komið í samskiptum fólks.
  • Litla Kvíðameðferðarstöðin: Sálfræðistofa sem sinnir tilfinningavanda og tengdum erfiðleikum hjá börnum, unglingum og ungu fólki. Einnig sinnir stofan handleiðslu og fræðslu fyrir fagfólk og stofnanir.
  • Míró markþjálfun og ráðgjöf: sinnir ADHD,- einhverfurófs,- og fjölskyldu markþjálfun ásamt þroskaþjálfun,ráðgjöf og fræðslu fyrir sveitafélög og fyrirtæki
  • Rætur – Sál og líkamsmeðferð: Rætur er samstarf heildrænna meðferðaraðila sem starfa með það að markmiði að vinna með rót vanda hvers einstaklings
  • Saga – Story House: er lífsgæðafyrirtæki með áherslu á fólk og sögur, fjölbreytta fræðslu, ráðgjöf, heilsueflandi ferðir og lífsgæðavörur. Þjónustan hentar fyrirtækjum og einstaklingum á öllum aldri.
  • Unnandi – fræðasetur: Námskeið, einkatímar og sérstakir viðburðir sem snúast um að finna samhljóm hugar, líkama og hjarta.
  • Veraldarvinir: Félagasamtök sem stuðla að heilbrigðum lífsháttum og betri umgengni manna við umhverfi sitt.
  • Yogahúsið: Býður upp á Kundalini jóga, Jóga Nidri, stök námskeið í hugleiðslu, jóga gegn kvíða, streitu og kulnun ásamt einkatímum í jóga og slökun.
  • Örmælir: frumkvöðlafyrirtæki sem þróar tæki fyrir vísindamenn í heilbrigðisrannsóknum.

Ummæli

Ummæli