Sorpa í rusli

Jón Ingi Hákonarson skrifar:

Jón Ingi Hákonarson

Eitt af meginverkefnum sveitarfélaga er sorphirða og hér á höfuð­borgar­svæðinu leikur byggðasamlagið SORPA lykilhlutverk í þeim efnum. Það hefur ekki farið framhjá mörgum að töluverður styr hefur verið um nýja jarð- og gasgerðarstöð á Álfsnesi vegna vanáætlunar kostnaðar upp á hálfan annan milljarð. Mögulegar afleiðing­ar þessa eru hækkun gjalda og álaga á íbúa, frestun annara mikilvægra framkvæmda í umhverfismálum á vegum SORPU og aukinn fjármagns­kostnaður. Framkvæmdin sjálf er góðra gjalda verð og liður í því að minnka urðun sorps sem er mikið framfaramál.

Við bæjarfulltrúar Viðreisnar á höfuð­borgarsvæðinu höfum látið okkur málið varða og teljum mikilvægt að sveitarfélögin stígi fast niður fæti og nýti tækifærið til að fara í nauðsynlega naflaskoðun á rekstrarfyrirkomulagi byggðarsamlagsins.

Það eru meiri líkur en minni á að rekstr­arform SORPU leiði til tölu­verðrar sóunar fjármuna vegna þess hversu veikt sambandið er á milli ákvarðana, ábyrgðar og eftirlits.

Sveitarfélag eins og Hafnarfjörður hefur ekki efni á að sóa fjármagni að óþörfu. Verkefnin hlaðast upp allt frá flísalögnum í Ásvallalaug til betri að­búnaðar heilabilaðra. Hver einasta króna skiptir máli í rekstri Hafnarfjarðar.

Íbúar Hafnarfjarðar eiga heimtingu á því að fulltrúar okkar í byggðasamlaginu SORPU gangi fram fyrir skjöldu og gæti hagsmuna okkar. Krafa okkar í Viðreisn er einföld, við viljum skipa neyðarstjórn sérfræðinga í fjármálum og verklegum fram­kvæmdum til að taka við tímabundið til að klára þessar mikilvægu framkvæmdir og koma á skipulagi sem bæði er einfalt og gagnsætt þar sem ábyrgð og ákvarðanir haldist í hendur. Það er einnig kominn tími til þess að gera réttmætar kröfur á stjórnendur og stjórnarmenn í stað þeirrar linkindar og meðvirkni sem virðist oft á tíðum ríkja hjá okkur eig­endum opinberra fyrirtækja. Við hljótum að geta gert betur.

Jón Ingi Hákonarson
oddviti Viðreisnar í bæjarstjórn Hafnarfjarðar.

Ummæli

Ummæli