Siðareglum á ekki að beita til að þagga niður óþægilega umræðu

Adda María Jóhannsdóttir, Elva Dögg Ásudóttir Kristinsdóttir og Gunnar Axel Axelsson skrifa

Adda María Jóhannsdóttir, Gunnar Axel Axelsson og Elva Dögg Ásudóttir Kristinsdóttir

Ásakanir bæjarfulltrúa Sjálfstæðis­flokksins, Ólafs Inga Tómassonar, um meint ósannsögli fulltrúa minnihlutans og brot á siðareglum varðandi umræðu um skil á lóðum í Skarðshlíð hafa verið til um­fjöllunar í seinustu tveimur blöðum Fjarðar­frétta.

Markmið siðareglna kjörinna fulltrúa hjá Hafnarfjarðarbæ er að vera rammi utan um störf þeirra. Þeim ber að fylgja lögum, reglum og samþykktum sem og sinni eigin sannfæringu, ásamt því að gæta almannahagsmuna og hagsmuna sveitar­félagsins.

Í þeim felst hins vegar ekki að kjörnir fulltrúar megi ekki tjá sig um mál og af­greiðslu þeirra ef sannfæring þeirra býð­ur þeim svo.

Kjörnum fulltrúum ber að hafa í heiðri grundvallarreglur góðrar stjórnsýslu, t.d. gagnsæja og upplýsta ákvarðanatöku og viðhafa lögmæt og málefnaleg sjónar­mið við sín störf.
Kjörnum full­trú­um ber einnig að virða valdmörk og fara ekki út fyrir umboð sitt. Þá eiga þeir einnig að sýna störf­um og rétt­indum ann­arra kjör­inna full­trúa virð­ingu.

Þetta er meðal þess sem fram kemur í siðareglum kjör­inna fulltrúa hjá Hafnar­fjarðarbæ. Siðareglum er hins vegar ekki ætlað að vera pólitísk kúgunartæki sem beita má til að þagga niður óþægilega um­­ræðu.

Bæjarfulltrúinn, Ólafur Ingi Tómas­son, hefur ekki lagt fram formlegt erindi vegna meintra brota fulltrúa minni­hlutans og aðspurður á fundi bæjar­stjórnar þann 14. mars sl. kvaðst hann ekki ætla að fylgja málinu eftir. Bæjar­fulltrúinn hefur þannig valið að ásaka fulltrúa minnihlutans á bæjar­stjórnar­fundi um brot á siðareglum en treystir sér hins vegar ekki til að standa við þau orð sín og senda forsetanefnd erindi þess efnis. Tilgangur ásakananna virðist því einungis hafa verið að reyna að koma í veg fyrir óþægilega umræðu enda staðfesta gögn málsins, og sú staðreynd að lóðaskilmálum hefur nú verið breytt, það sem fram kom í málflutningi og bókun fulltrúa Samfylkingar og Vinstri grænna varðandi skil á lóðum í Skarðshlíð.

Adda María Jóhannsdóttir bæjarfulltrúi
Elva Dögg Ásudóttir Kristinsdóttir bæjarfulltrúi
Gunnar Axel Axelsson bæjarfulltrúi

Ummæli

Ummæli