Opnum Bláfjallaveg

Egill Guðmundsson og Pálmar Pétursson

Í byrjun árs 2020 birti Vegagerðin stuttaralega tilkynningu þar sem segir: „Þriðjudaginn 4. febrúar 2020 klukkan 15 verður Bláfjallavegi (417), frá Bláfjallaleið að hellinum Leiðarenda lokað varanlega vegna vatnsverndarsjónarmiða.“

Okkur eru ekki kunnug rök fyrir þessari lokun né hver eða hverjir hafa gert úttekt sem styðja þessa óheppilegu ákvörðun.

Við erum báðir áhugamenn um útiveru og skíðamennsku og stundum Bláfjöllin nánast alla daga sem þar er opið. Lokun Bláfjallavegar er afar óheppileg frá sjónarhóli okkar séð og neyðir alla Hafnfirðinga og Reyknesinga til að keyra að óþörfu um mjög fjölfarna vegi og lengja umtalsvert leiðina í Fjöllin.

Að okkar mati er brýn þörf á að opna Bláfjallaveginn að nýju bæði til að auðvelda og létta Hafnfirðingum og Reyknesingum aðganginn að sameiginlegum skíðasvæðum og um leið að auðvelda fólki að komast úr Bláfjöllum ef Suðurlandvegur lokast vegna slysa, veðurs eða annarra orsaka.

Hafnarfjarðarbær á bæði aðild að Bláfjallafólkvangi og Reykjanesfólkvangi sem Bláfjallavegur liggur um og hvetjum við alla bæjarstjórnina til að vinna sem einn maður að opnun vegarins og um leið stuðla að því að vegurinn verði bundinn slitlagi og hann þjónustaður allt árið.

Egill Guðmundsson skíðagöngumaður
Pálmar Pétursson svigskíðamaður

Ummæli

Ummæli