fbpx
Þriðjudagur, apríl 16, 2024
target="_blank"
HeimFréttirSkólamálLeikskóli á Öldurnar

Leikskóli á Öldurnar

Friðþjófur Helgi Karlsson skrifar

Mikilvægt er að hefja undirbúning að uppbyggingu á leikskóla á Öldunum í Suðurbæ nú þegar. Síðan starfsstöð Brekkuhvamms (nú Smárahvamms) við Hlíðarbraut var lögð niður á síðasta skólaári sækja nú um 100 leikskólabörn er búa í Suðurbæ, leikskóla í önnur skólahverfi. Er það umtalsvert meira en í nokkru öðru hverfi bæjarins. Af því hlýst mikið óhagræði fyrir íbúa hverfisins með börn á leikskólaaldri. Leikskóla­þjón­usta er nærþjónusta og mikil­vægt er að hún sé það m.a. með tilliti til umhverfis­mála, gæða íbúahverfa sem og annarra þátta.

Á Öldunum í næsta nágrenni Öldu­túnsskóla er á skipulagi lóð fyrir 4 – 6 deilda leikskóla. Sú lóð hentar mjög vel til uppbyggingar á leikskólaþjónustu þegar t.d. er horft til samgangna og nálægðar við hverfisskólann. Nálægð við hann býður upp á margháttaða möguleika á eflingu á samstarfi á milli grunn- og leikskóla í hverfinu sem er mjög mikilvægt út frá fjölmörgum faglegum þáttum.

Hverfið er að ganga í gegnum endurnýjun á íbúasamsetningu og þörf fyrir leikskólapláss í hverfinu fer því vaxandi. Almennt hlýtur líka að vera kappsmál sveitarfélagsins að lækka enn frekar inntökualdur barna á leikskóla, helst þannig að leikskólinn taki við börnum í nám um leið og fæðingarorlofi foreldra þeirra líkur. Það er stórt hags­munamál fyrir foreldra barna á leikskólaaldri sem og börnin sjálf sem fá fyrr að njóta góðr­ar menntunar í því faglega umhverfi sem ríkir í leik­skólum bæjarins og við getum ver­ið afar stolt af.
Ég mun beita mér, ásamt flokks­syst­kinum mínum, fyrir því í fjárhags­áætl­unargerð í mínu ráði, umhverfis- og fram­kvæmdaráði, að sett verði fjár­magn strax á næsta ári til að hefja upp­byggingu á leikskóla á Öldunum. Til hagsbóta fyrir íbúa hverfisins sem eiga börn á leikskólaaldri sem og börnin sjálf sem sækja munu þennan nýja og langþráða leikskóla.

Friðþjófur Helgi Karlsson
varabæjarfulltrúi Sam­fylk­ingarinnar í Hafnarfirði
og fulltrúi í umhverfis- og framkvæmdaráði.

Ummæli

Ummæli

Tengdar greinar
- H1 -

Nýjustu greinar

H2