Ólafía heimsmeistari í spartversku hindrunarhlaupi

Ólafía bar stolt íslenska fánann en hún var eini íslenski keppandinn.

Ólafía Kvaran, 49 ára hjúkrunar­fræðingur úr Hafnarfirði, varð sl. sunnudag heimsmeistari í aldurs­flokki 45-49 ára kvenna á Spartan Beast heimsmeistara­mótinu í hindrunarhlaupi í Squaw Valley í Kaliforníu í Bandaríkjunum.

Heimsmeistarinn Ólafía með verðlaunin.

Hún þurfti að tak­ast á við mjög krefjandi að­stæður í 23 km hlaupinu sem var með 1400 m hækkun og 36 hindrunum, svo ekki sé minnst á snjó, kulda og rok sem gerði mörgum keppendum erfitt fyrir. Hindranirnar á hlaupaleiðinni voru til dæmis sund, klifur og ýmiss konar burður.

Mótið var haldið í North Lake Tahoe þar sem vetrar­ólympíuleikarnir voru haldnir árið 1960.

Ólafía kom í mark á 4:08:34 klst. og varð nokkuð örugglega fyrst af 31 í sínum aldursflokki, 17. af 263 konum og nr. 198 af 683 keppendum.

Sparan Race er hindrunarhlaup þar sem keppendur takast á við ýmiss konar hindranir á hlaupaleiðinni, sem er utanvega,  og oft með töluverðri hækkun.  Íþróttin nýtur gífurlegra vinsælda í Bandaríkjunum og keppendum fer jafnfram fjölgandi í Evrópu og Asíu, enda keppt í um það bil 40 löndum í heiminum.

Þrautirnar voru fjölbreyttar

Ólafía tryggði sér þátt­töku­réttinn með því að verða 4. í sínum aldursflokki á mjög erfiðu Spartan Beast móti í Vestur Virginíu 24. ágúst sl. þar sem hún kom í mark á 3:33:20 klst.
Þá varð hún einnig fyrst í sínum aldursflokki og 3. kvenna í Spartan Sprint móti í Vermont 15. september þar sem hún kom í mark á 1:11:36 klst.

Hér má sjá myndband frá keppninni sem sýnir vel hvernir aðstæðurnar voru.

Ólafía lét ekki gaddavír né kulda hindra sig í að ná árangri.

Fréttin birtist fyrst í fréttablaðinu Fjarðarfréttum 2. október 2019. Hér birt uppfærð.

Ljósmyndir: Spartan og Friðleifur Friðleifsson.

Ummæli

Ummæli