Vatn flaut úr vatnsvél um gólf Tónlistarskólans

Skólinn rafmagnslaus að hluta

Slökkviliðið sá um að hreinsa upp mesta vatnið

Það var óskemmtileg sjón að sjá þegar starfsmaður Tónlistarskólans í Hafnarfirði mætti til vinnuna um hálf átta leytið í morgun. Vatn var á gólfum og lak niður stiga af efri hæð. Þar var töluvert vatn og þegar betur var að gáð sást að vatn sprautaðist frá vatnsvél á kennarastofunni á annarri hæð.

Vatn flæddi undir innréttingar og niður á næstu hæð

Greinilegt var að vatn hafði lekið lengi en öryggisfyrirtæki hafði fengið boð úr skólanum á miðnætti en ekkert sást athugavert utanfrá og ekki var farið inn.

Vatn fór víða, m.a. inn á bókasafn skólans þar sem eru rafmagnstenglar í gólfi og þar fór vatnið niður og fossaði vatn niður í rafmagnstöflu á jarðhæð. Rafmagn hefur því farið af hluta skólans um miðnætti.

Slökkviliðið mætti á staðinn og hreinsaði upp vatnið og starfsfólk hafði í nógu að snúast við að þurrka hluti og athuga. Einhver hljóðfæri blotnuðu lítillega en vonast var eftir að ekkert hafi orðið fyrir skemmdum.

Vatn hafði flætt úr gólftenglum niður í töflu á jarðhæð

Tenging við vatnsvélina hefur áður skemmst en þá seytlaði vatn frá henni. Nú ákvað fyrirtækið sem leigir vélina að setja öryggisloka á vatnsinntakið sem á að fyrirbyggja að svona geti komið fyrir.

Enn er rafmagnslaust í hluta skólans og vatn seytlar niður í eina kennslustofu á jarðhæð. Hefur þetta áhrif á skólastarfið en ekki er gert ráð fyrir öðru en að kennsla fari að mestu fram eins og venjulega.

 

Vatnslekinn varð á annarri hæð og vatn lak niður á jarðhæð.