Létu grenjandi rigningu ekki aftra sér frá að planta trjám í sjálfboðavinnu

Árlegur sjálfboðaliðsdagur Skógræktarfélags Hafnarfjarðar var í morgun.

Plantað var í brekkurnar ofan við Hamranesflugvöll, annað árið í röð. - Ljósm.: Bryndís Björgvinsdóttir.

Um 25 manns mættu í grenjandi rigningu og roki til að gróðursetja tré á sjálfboðaliðadegi Skógræktarfélags Hafnarfjarðar. Ekki voru allir háir í loftinu en eiga eftir að fylgjast með trjánum stækka um leið og þeir stækka sjálfir.

Ekki voru allir háir í loftinu sem mættu.

Löng hefð er fyrir þessum degi, sem og starfi sjálboðaliða við gróðursetningu hjá félaginu og er það mikivægur þáttur í félagsstarfinu.

Aðstaðan var ekki sú besta en enginn lét það aftra sér. Fremst má sjá Steinar Björgvinsson, framkvæmdastjóra félagsins við gróðursetningu.

Gróðursettar voru 650, tveggja til fjögurra ára trjáplöntur í hlíðarnar þar sem öskuhaugar bæjarins voru áður og síðan jarðvegstippur, ofan við módelflugvöllinn.

Svæðið er grýtt en frjósamt og var fremur erfitt að grafa holur og var upp bratta brekku að fara með plöntur. Þetta létu þessir hörðu sjálboðaliðar ekki aftra sér enda beið þeirra gómsæt súpa í lokin í húsakynnum Skógræktarfélagsins í Höfðaskógi.

Ljósmyndir: Bryndís Björgvinsdóttir.

 

Ummæli

Ummæli