20 þúsund kr. dagsektir fyrir að hafa sófasett, dekk og timbur á lóð

Miðbær Hafnarfjarðar

Víða má sjá drasl í Hafnarfirði, ekki síst á iðnaðarsvæðum þar sem mikil tilhneiging virðist vera til þess að safna bílhræjum og öðru drasli á ógirtar iðnaðarlóðir. Aðrir sýna sóma sinn í að hafa snyrtilegt í kringum sig og eru með í að gera bæinn að þeim fallega stað sem hann er.

Ekki hafa verið áberandi aðgerðir yfirvalda til að sporna við drasli á einkalóðum en nú virðist vera tekin stefna í þá átt ef marka má aðgerðir byggingarfulltrúa sem bregst við drasli á lóðinni Reykjavíkurvegi 1.

Kvartanir höfðu borist vegna lausamuna sem safnast hafa á lóðinni en í fundargerð afgreiðslufundar skipulags- og byggingarfulltrúa frá í dag segir að á lóðinni Reykjavíkurvegur 1 hafi safnast mikið af lausamunum, sófasett, dekk, timbur og fleira. Hefur eigandanum verið sent bréf en hann hefur ekki brugðist við því skv. fundargerðinni.

Því samþykkti afgreiðslufundur skipulags- og byggingarfulltrúa að leggja dagsektir á eiganda að Reykjavíkurvegi 1, 20.000 kr. á dag frá og með 29. apríl 2020.

Eru þær lagðar á og vísað til 56.gr. laga um mannvirki nr. 160/2010.

Ummæli

Ummæli