Strandgata 25 breytist úr skrifstofuhúsnæði í íbúðarhús

Strandgata 25

Strandgata 25 er eitt af gömlu reisulegu húsunum við Strandgötu þó það megi muna fífil sinn fegri.

Húsið var upphaflega byggt sem íbúðarhús, en hefur verið nýtt sem skrifstofuhúsnæði undanfarna áratugi. Húsið var lengi kennt við Sjóvá, en skrifstofur félagsins voru í húsinu en þarna voru líka m.a. umboðsskrifstofur Loftleiða og Shell.

Nýverið festi Kristján Hafsteinsson og fjölskylda kaup á húsinu og hefur fengið leyfi til að breyta húsinu aftur í íbúðarhús eftir teikningum Kára Eiríkssonar arkitekts og hafa þegar flutt inn.

Þorsteinn Egilsen byggði húsið árið 1904 og kom það tilneglt frá Noregi. Það komst síðar í eigu Einars kaupmanns Þorgilssonar. Árið 1905 kvæntist hann þriðju konu sinni Rannveigu Thordal, fædd Síverstsen.

Strandgata 25, upp úr 1904.

Húsið er talið standa í Brúarhraunslóð, en nánar tiltekið er það í lóð tveggja gamalla bæja, sem undir lok voru liðnir um 1880 og hét sá vestari Þorkellskofi, líka Björnskofi, en sá eystri hét Geirþrúðarbær. Ofarlega í þessari lóð var svo hús þetta reist. Myndaðist því allstór forgarður við húsið. Var garður þessi fyrst varinn með grjótgarði fram við Sjávargötuna, síðar Strandgötuna. Hlið var á garði þessum miðsvegar og gangstígur upp að framdyrum, er skipti garðinum í tvennt.

Árið 1905 um vorið mun frú Rannveig þegar hafa gróðursett rifsberjarunna í eystri hlutanum, en í vestari hlutanum gróðursetti hún skandinavískt reynitré, og stóð það í garðinum miðjum. Ofar í garðinum gróðursetti hún heggtré og íslenskar reyniviðarhríslur. Ekki döfnuðu tré þessi vel. Mun þar mestu um hafa valdið saltmengaður jarðvegur og svo sjávarlöður sem dreif á land upp og yfir garðinn frá Brúarhraunsvör og Brúarhraunskletti. Svo mikið er víst að skandinavíski reyniviðurinn stóð því nær alveg í stað þar til komnar voru uppfyllingar framan við Strandgötuna, nema hvað stofninn gerðist bolgildur mjög. Þegar uppfyllingin var komin, tók tréð nokkuð að vaxa. Um 1940 var íslenski reyniviðurinn dauður, en þá var skandinavíski reyniviðurinn og heggtréð flutt upp í Sléttuhlíð að sumarbústað þeirra bræðra Þorgilsar og Ólafs Einarssonar. En garðurinn sjálfur var nokkru síðar lagður undir Strandgötuna  við þær breytingar er á henni voru gerðar.

Strandgata 25 um 1920-30. Ljósm.: Sæmunur Guðmundsson

Heimild: Sagnablöð Skógræktarfélags Hafnarfjarðar, skv. frásögn Þorgilsar Einarssonar.

Ummæli

Ummæli