Foreldrar í Hraunvallaskóla fengu í gær bréf frá skólastjóra þar sem greint var frá því að starfsmaður skólans hafi verið leystur frá störfum vegna máls sem komið hafi upp í skólanum í síðustu viku og væri til rannsóknar hjá lögreglu.
„Kæru foreldrar/forráðamenn
Í síðustu viku kom upp mál í Hraunvallaskóla sem snertir starfsmann skólans og er málið nú til rannsóknar hjá lögreglu. Þar sem málið er á rannsóknarstigi er ekki hægt að veita neinar upplýsingar að svo stöddu. Málið fór strax til rannsóknar hjá lögreglu og hefur verið til rannsóknar frá miðvikudeginum 20. maí. Sama dag var viðkomandi starfsmaður leystur frá störfum á meðan rannsókn stendur yfir, gagngert til að tryggja öryggi allra hlutaðeigandi og rannsóknarhagsmuni.
Málið er litið mjög alvarlegum augum og fór strax í viðeigandi farveg og ferli innan skólans og hjá skólayfirvöldum í Hafnarfirði þar sem unnið er samkvæmt fyrirfram skilgreindu verklagi í samstarfi við lögregluyfirvöld. Stjórnendateymi skólans var strax upplýst um aðstæður og eðli máls auk þess sem starfsfólk hefur verið upplýst um það að mál starfsmanns innan skólans sé til rannsóknar. Utanaðkomandi fagaðilar voru kallaðir til, starfsmannahópnum til stuðnings og ráðgjafar þannig að tryggja megi hagsmuni og öryggi heildarinnar. Áfallahjálparteymi skólans hefur verið virkjað auk foreldraráðs skólans með það fyrir augum að vel sé tekið utan um skólasamfélagið í heild sinni. Ekki er hægt að gefa upp ítarlegri upplýsingar eins og sakir standa til að tryggja megi trúnað og gæta persónuverndar hlutaðeigandi aðila.
Vinsamlega beinið öllum vangaveltum, fyrirspurnum og áhyggjuefni beint til mín.
Kær kveðja,
Lars Jóhann Imsland skólastjóri.“
DV og Stöð 2 greindu frá því í gær að starfsmaður í frístundaheimili í Hraunvallaskóla væri grunaður um að beita tvö börn í fyrsta bekk kynferðislegu ofbeldi á salerni skólans.
Haft er eftir verjanda mannsins að málið sé á viðkvæmu stigi og erfitt sé að tjá sig um það að svo stöddu, sérstaklega vegna þess að ekki sé búið að yfirheyra börnin formlega hjá Barnahúsi. Hann tekur þó sérstaklega fram að maðurinn neiti alfarið sök og að hann hafi sýnt mikinn samstarfsvilja við lögreglu sem nú rannsakar málið. Hann hafi leyft húsleit og gefið aðgang að síma og tölvu án nokkurra undanbragða.
Maðurinn gengur laus en á föstudag felldi Landsréttur úr gildi gæsluvarðhaldsúrskurð yfir manninum.
Málið er litið mjög alvarlegum augum
