Slökkvistarf stóð fram eftir degi – kvoðu dælt í kjallarann

Enn verið að slökkva um 17 tímum eftir eldsupptök

Kvoðu var dælt inn í kjallarann

Allt er brunnið sem brunnið gat að Hvaleyrarbraut 39 þar sem kviknaði í á ellefta tímanum í gær. Að sögn vettvangsstjóra fyrr í dag logaði enn í vestasta hluta kjallarans. Ekki var nákvæmlega vitað hvað þar væri inni og ekki var talið forsvaranlegt að fara þar inn. Var froðu dælt inn í kjallarann en hún hefur þá hæfileika að smjúga inn alls staðar og kæfa eldinn.

Enn rauk mikið úr húsinu á þriðja tímanum í dag.

Tilkynnt var um eldinn kl. 22.11 og þegar fyrstu slökkvibílar komu á vettvang var mikill eldur á efri hæðinni og þak þegar byrjað að falla. Náði eldurinn svo niður á neðri hæðina og ekkert var við ráðið.

Búið er að rífa eldri hæðina og standa steyptir veggir einir eftir. Starfsmenn Furu komu með krabba í nótt og var þegar hafist handa við að fjarlægja járnplötur áður en þær færu að fjúka. Var haldið áfram í dag að rífa efri hæðina með krabbanum sem mokaði rústunum í gáma sem ekið var svo með á brott.

Kvoðunni dælt inn í kjallarann

Enn lagði töluverðan reyk frá húsinu á þriðja tímanum í dag en búist var við að hægt væri að slökkva síðustu glæðurnar í kjallaranum með kvoðunni.

Á efri hæðinni var Glugga- og Hurðasmiðja SB ehf. en fyrra húsnæði fyrirtækis með sama nafni og var við Dalshraun, brann til grunna árið 1996. Ekki er vitað um eldsupptök.

Horft að brunastað frá Lónsbraut í dag.

Á neðri hæðinni var fyrirtækið Bindivír ehf. og bílaverkstæði.

Vindur hefur haldist hagstæður og mestur reykur hefur farið beint á haf út.

Dælubíll dælir vatninu úr brunahönum

Gríðarlegt vatnsmagn var notað við slökkvistarfið og tengt við marga brunahana sem dælt var úr. Við það féll þrýstingur nokkuð svo Vatnsveitan þurfti að leita til Vatnsveitu Garðabæjar til að halda uppi þrýstingi en veitukerfin eru samtengd og það því auðvelt.

Ummæli

Ummæli