Segir Hafnarfjarðarbæ gera aðför að rekstri Skátafélagsins Hraunbúa

Gríðarleg óánægja er nú meðal forsvarsfólk Skátafélagsins Hraunbúa.

Skammt er síðan félagið fagnaði 100 ára skátastarfi í Hafnarfirði og bæjarstjóri hafði fögur orð um mikilvægi starfsins.

Umhverfis- og framkvæmdaráð sam­þykkti á fundi sínum 28. maí að leggja til að samningur við Hraunbúa um rekstur tjaldsvæðisins yrði endur­skoð­aður og núverandi samningi sagt upp. Var erindinu vísað til íþrótta- og tóm­stundanefndar. Hefur íþrótta- og æskulýðsfulltrúi þegar sagt upp samning rekstrarsamningi við Hraunbúa.

Samningurinn sem ráðið vill segja upp er frá 4. maí 2022 og gilti frá 1. janúar 2021 til 31. desember 2026 og er með 6 mánaða uppsagnarfresti. Samn­ingurinn er ekki aðeins um rekstur tjaldsvæðisins, heldur einnig um rekstur skátamiðstöðvarinnar Hraunbyrgis þar sem stærsta skátafélag landsins, starfar. Samningurinn var undirritaður af bæjarstjóra f.h. Hafnarfjarðarbæjar.

Kom félaginu í opna skjöldu

Í harðorðri grein á vef félagsins segir Bjarni Freyr Þórðarson, félagsforingi, ákvörðunina koma félaginu í opna skjöldu og í mjög viðkvæmt ástand. „Ástæða uppsagnar er ágreiningur milli málsaðila um viðhald á tjaldsvæði bæjarbúa, tjald­svæði sem Skátafélagið Hraunbúar hefur rekið í yfir 30 ár í farsælu samstarfi við bæinn.“

Segir hann ákvörðun bæjarins einhliða en samningurinn sé grundvöllur fyrir öflugu og vönduðu æskulýðsstarfi í bænum. „Ákvörðunin sýnir í verki hvernig fulltrúar bæjarins standa hreinlega í vegi fyrir uppbyggingu æskulýðsstarfs í bænum.“ Bjarni segir að samningnum sé sagt upp í miðri samningalotu um sérstakt viðhald á tjaldsvæðinu en svæðið hafi komið mjög illa undan rigningasumri 2024.

Deilt um viðhald

„Bærinn segir ábyrgð á viðhaldi vera okkar þrátt fyrir að í samningi standi greinilega að allt stærra viðhald skuli greitt samkvæmt eignaskiptasamningi en bærinn er eini eigandi tjaldsvæðis og þjónustuhúss þess,“ segir Bjarni.

„Með þessari aðgerð er verið að slíta lífæð skátastarfsins í bænum. Tekjur tjaldsvæðisins hafa verið lykilþáttur í að halda úti starfi félagsins, standa undir húsnæðisrekstri og ráða starfsfólk allt árið um kring. Á fundum hafa bæjarstarfsmenn jafnvel lýst yfir vilja til að loka tjaldsvæðinu, án þess að leggja fram neina skýra framtíðarsýn eða greiningu á áhrifum þess á barna- og ungmennastarf í bænum. Nú blasir við sviðsmynd þar sem bæjarfélagið lokar tjaldsvæðinu, skerðir tekjuforsendur félagsins og getur þannig óbeint leitt til þess að Hraunbyrgi loki – með ófyrir­séðum áhrifum á skátastarf barna í Hafnarfirði.“

Ekki byggt á gagnkvæmu trausti

Segir hann að mat stjórnar félagsins sé að þessi ákvörðun endurspegli dýpri vanda í stjórnsýslu bæjarins – „þar sem samstarf við frjáls félagasamtök er ekki byggt á gagnkvæmu trausti, heldur einhliða túlkunum, valdboði og ítrekaðri vanrækslu á samtali og samráði. Starfsmenn hafa sýnt skýr merki um valdníðslu í meðhöndlun þessa máls og látið hjá líða að svara málefnalegum erindum Hraunbúa. Þess í stað er leitað að tæknilegum leiðum til að loka á starfsemi sem þjónar bæði beint og óbeint hundruðum barna og ungmenna ár hvert. Á sama tíma er milljörðum af peningum bæjarbúa eytt í knatthús og önnur íþróttamannvirki.“

Lýkur Bjarni grein sinni, sem lesa má á vef félagsins, hraunbuar.is með orðunum: „Við stöndum ekki ein – og við ætlum ekki að gefast upp“.

Fljótfærni hjá embættismanni?

Grein hans hefur fengið gríðarleg viðbrögð og fulltrúi í íþrótta- og æskulýðsnefnd hafði að orði að tilgangslítið væri að hafa nefnd ef embættismaður tekur ákvarðanir áður en nefnd fær að fjalla um málið.

Ekki ljóst hvort samningnum verði sagt upp að sögn bæjarstjóra

Í svari Valdimars Víðissonar við fyrirspurnum Fjarðarfrétta segir hann: „Ef ÍTH leggur til að aðilar málsins endursemji um tjaldsvæðið og salernin þá er það ekki uppsögn á samningi heldur breyting á fylgiskjali samnings. Því er ekkert ljóst hvort við segjum upp samningnum eða ekki.“

Félagsforingi Hraunbúa hefur verið í viðræðum við bæjarstjóra sem svaraði ekki ítarlegri spurningum Fjarð­ar­­frétta um hvað málið snérist nákvæmlega.

Uppfært – Uppsögnin ekki staðfest

Á fundi íþrótta- og tómstundanefndar í dag var málið tekið fyrir og skv. heimildum Fjarðarfrétta staðfesti nefndin ekki uppsögnina en vildi endurskoða hluta samningsins. Á fundinum kom fram að málið snérist ekki aðeins um tjaldsvæði heldur einnig salernishúsið sem skátafélagið sér um rekstur á.

Ummæli

Ummæli