Sjálfstæðisflokkur og Framsókn höfnuðu því að afsala sér launahækkunum

Forseti bæjarstjórnar, Kristinn Andersen, var einn bæjarfulltrúa í bæjarstjórnarsalnum en hinir voru með á netinu.

Fulltrúar Samfylkingarinnar í bæjarstjórn Hafnarfjarðar lögðu fram tillögu á bæjarstjórnarfundi sl. miðvikudag um að reglum um þóknun til kjörinna fulltrúa verði breytt áður en kemur til fyrirhugaðra hækkana á þingfararkaupi þann 1. maí nk. þannig að sú hækkun hafi ekki áhrif á þóknun til kjörinna fulltrúa í Hafnarfirði.

Lögðu þeir til að viðmiðunarfjárhæðin, sem þóknun til kjörinna fulltrúa byggir á, verði fest í þeirri krónutölu sem nú er og taki framvegis breytingum í samræmi við hlutfallslega breytingu á meðaltali reglulegra launa ríkisstarfsmanna ár hvert. Lögðu þeir til að ekki komi til neinna hækkana fyrr en í fyrsta lagi árið 2021.

Var þessi tillaga lögð fram undir liðnum COVID-19, aðgerðaráætlun á bæjarstjórnarfundinum

Sumarið 2017 var reglum um þóknun til kjörinna fulltrúa hjá Hafnarfjarðarbæ breytt þannig að þær tækju mið af þingfararkaupi. Ein helsta forsenda breytingarinnar var sú að kjörnir fulltrúar þyrftu ekki sjálfir að taka ákvarðanir um sín laun.

Í greinargerð með tillögunni segir að sumarið 2018 samþykkti Alþingi að leggja kjararáð niður til þess að skapa aukna sátt á vinnumarkaði um launaákvarðanir æðstu embættismanna og taka laun þessara aðila nú breytingum í samræmi við hlutfallslega breytingu á meðaltali reglulegra launa ríkisstarfsmanna eins og hún birtist í tölum Hagstofu Íslands fyrir næstliðið almanaksár.

„Við þær fordæmalausu aðstæður sem uppi eru vegna Covid-19 þurfa allir að leggjast á eitt. Í aðgerðaráætlun bæjarstjórnar Hafnarfjarðar vegna faraldursins var því vísað til allra stoðsviða bæjarins að leggja fram tillögur sem miða að því að lækka rekstrarkostnað svo bregðast megi við auknum útgjöldum sem eru óhjákvæmileg. Í því ljósi er eðlilegt að kjörnir fulltrúar leggi sitt af mörkum og taki ekki við launahækkunum fyrr en í fyrsta lagi árið 2021 eða á meðan efnahagsleg áhrif Covid-19 vara.“

Hækkun á þingfararkaupi sem átti að verða þann 1. júlí 2019 var frestað í tengslum við gerð lífskjarasamninga en á að koma til framkvæmda þann 1. maí nk. Fulltrúar Samfylkingarinnar lögðu til að samband útreiknaðrar þóknunar til kjörinna fulltrúa við þingfararkaup yrði rofið áður en til þeirrar hækkunar kemur.

Vildi vísa tillögunni til forsetanefndar

Guðlaug Kristjánsdóttir lagði til að tillögu fulltrúa Samfylkingarinnar yrði vísað til forsetanefndar en sú tillaga var felld þar sem Adda María, Friðþjófur Helgi, Guðlaug, Jón Ingi, Bjarney greiddu atkvæði með tillögunni en 6 fulltrúar meirihluta greiddu atkvæði gegn tillögunni.

Var þá upprunalega tillagan frá fulltrúum Samfylkingarinnar um breytingu á reglum um þóknun til kjörinna fulltrúa borin upp en var felld þar sem Adda María Jóhannsdóttir, Friðþjófur Helgi Karlsson, Guðlaug Svala Steinunnar Kristjánsdóttir, Jón Ingi Hákonarson og Bjarney Grendal Jóhannesdóttir greiddu atkvæði með tillögunni en Rósa Guðbjartsdóttir, Kristinn Andersen, Ágúst Bjarni Garðarsson, Ólafur Ingi Tómasson, Helga Ingólfsdóttir og Kristín María Thoroddsen, fulltrúar Sjálfstæðisflokks og Framsóknar greiddu atkvæði gegn tillögunni.

 

Væri eðlilegt að kjörnir fulltrúar legðu sitt af mörkum og taki ekki við launahækkunum

Fulltrúar Samfylkingarinnar lýstu yfir vonbrigðum með að tillagan um breytingu á reglum um þóknun til kjörinna fulltrúa hafði verið felld af fulltrúum meirihluta Framsóknarflokks og Sjálfstæðisflokks.

„Í ljósi þeirra fordæmalausu aðstæðna sem uppi eru vegna Covid-19 þurfa allir að leggjast á eitt. Stoðsvið bæjarins hafa lagt mikla vinnu í að rýna hvaða aðhaldsaðgerða sé hægt að grípa til svo bregðast megi við auknum útgjöldum sem óhjákvæmilegt er að verði vegna faraldursins. Í því ljósi er eðlilegt að kjörnir fulltrúar leggi sitt af mörkum og taki ekki við launahækkunum á meðan það ástand varir. Afgreiðslan í dag veldur okkur því miklum vonbrigðum,“ segir í bókun þeirra Öddu Maríu Jóhannsdóttir og Friðþjófs Helga Karlssonar.

Vilja frekar horfa fram á veginn

Í bókun fulltrúa Sjálfstæðisflokks og Framsóknar segir: „Árið 2017 samþykkti bæjarstjórn að taka ákvörðun um laun bæjarfulltrúa úr höndum bæjarstjórnar, eins og verið hafði, og voru þá upplýsingar um launakjör bæjarfulltrúa, sem staðið hafa óbreytt frá þeim tíma, birtar á vef bæjarins þar sem þær liggja fyrir.

Með tillögu Samfylkingarinnar um lækkun launa er sleginn nýr tónn, sem ekki hefur heyrst áður, um leiðir til að bregðast við veirufaraldrinum sem nú gengur yfir. Í stað þess að hverfa aftur til handvirkra launatilfæringa fyrri tíma horfum við fram á veginn og leggjum áherslu á vinnu að þeim verkefnum og tækifærum sem bætt geta hag og velferð heimila og fyrirtækja í Hafnarfirði.“

Ummæli

Ummæli