Hætt við dýra færslu á fyrirhugaðri Ásvallabraut

Tengist við nýtt hringtorg á Flóttamannaveginum

Skipulags- og byggingarráð hefur falið umhverfis- og skipulagsþjónustu að vinna áfram að tillögu C, nýrri tillögu að legu Ásvallabrautar við Kaldárselsveg og breytingu á deiliskipulagi með hliðsjón af því. Ásvallabraut liggur frá efsta hluta Vallarhverfisins og átti að tengjast við Brekkuás skv. upprunalegu skipulagi. Íbúar í Áslandi 3 lýstu yfir óánægju með legu brautarinnar og töldu hana liggja of nálægt húsum sínum. Hins vegar komu engar kvartanir úr Vallahverfinu en þar liggur brautin við bakgarð fjölmargra lóða.

Í framhaldi lét skipulags- og byggingarráð vinna nýja tillögu þar sem tekinn var sveigur á brautina til norðurs og hún látin koma í krappri beygju áður en kom niður að Kaldárselsvegi sunnan við hesthúsin í Hlíðarþúfum. Þessi tilfærsla hefði kostað að lágmarki 50 millj. kr. en auk þess hefið verið nauðsynlegt að gera undirgöng fyrir ríðandi fólk undir Kaldárselsveg. Hefði þurft að sprengja mikið og fara í gegnum skógi þakið svæði.

Nú hefur verið hætt við þá tillögu og nú er unnið eftir tillögu sem gengur út á að færa brautina fjær byggðinni í Áslandi 3 og nær hesthúsunum, í vegastæði væntanlegs ofanbyggðavegs. Síðan á brautin ekki að tengjast Brekkuásnum heldur að tengjast Kaldárselsvegi, Flóttamannavegi og Brekkuási í hringtorgi á Flóttamannaveginum skammt neðan núverandi Kaldárselsvegar. Þessi leið hefur ekkert verið kynnt ennþá en sjá má hana sem fylgiskjal með fundargerð skipulags- og byggingarráðs 2. maí 2016.

Ummæli

Ummæli