Kórstarfið í Öldutúnsskóla hófst með tónleikum Sinfóníuhljómsveitar Íslands

Kórinn verður 55 ára í nóvember

Skjáskot úr útsendingu RÚV frá tónleikunum.

Kór Öldutúnsskóla hóf hauststarfið með miklum eldmóð sem endaði með þátttöku á tónleikum Sinfóníuhljómsveitar Íslands í Hörpu þann 10. september.

Tónleikarnir báru yfirskriftina „Til hamingju með afmælið Beethoven,“ en 250 ár eru liðin frá fæðingu hans.

Tónleikarnir voru sýndir á RÚV að kvöldi afmælisdags tónskáldsins. Krakkarnir tóku þátt í söng með þremur öðrum skólum í Gleðisöngnum úr síðustu sinfóníu Beethovens, Óðnum til gleðinnar.

Brynhildur Auðbjargardóttir, kórstjóri Kórs Öldutúnsskóla

Brynhildur Auðbjargardóttir kórstjóri segir að upphaflega hafi viðburðurinn átt að vera 26. september, fjölskyldutónleikar með áhorfendur í húsi.

„Þegar við mættum til starfa í haust þá var komin ný dagsetning frá Sinfóníunni þar sem tónleikunum var breytt í útsendingu hjá RÚV,“ segir Brynhildur. Kórstjórinn þurfti því að hafa hraðar hendur við að kenna börnunum, sem voru að koma úr sumarfríi, þriggja radda útsetningu á Gleðisöngnum eftir Hildigunni Rúnarsdóttur ásamt nýjum texta eftir Braga Valdimar Skúlason. „Þetta hafðist,“ sagði Brynhildur í samtali við Fjarðarfréttir, „með góðum stuðningi skólastjórnenda og foreldra og endaði verkefnið með glæsilegum flutningi sem við erum öll stolt af.“

Skjáskot úr útendingu RÚV

Kórinn verður 55 ára í nóvember

Kórinn verður 55 ára 22. nóvember næstkomandi og hefur það áhrif á skipulag vetrarins að sögn Brynhildar sem segir kórinn og skólann munu halda upp á afmælið á afmælisdeginum og einnig með vortónleikum í vor.

Ummæli

Ummæli